ئەمەریکا لە ئەمڕۆ دووشەممەوە سزا توندەکانی بەسەر ئێران سەپاندەوە، ئەوانەی لە پاش ڕێکەوتننامە ناوکیـیەکەی ساڵی 2015 لابرابوون.
سزاکانی کۆمەڵێک کەرتی گرنگی سەرچاوەی دارایی ئێران دەگرێتەوە. بەڵام ئەمە یەکەم جار نیـیە سزای توند بەسەر ئێراندا بسەپـێنرێت. پـرسیار لێرەدا ئەوەیە ئەم جارە هەتا چەند ئەم سزایانە کاریگەریان دەبێت.
ئاگری ئیسماعیل‌نەژاد، ڕۆژنامەنووس لە نەمسا لە وتووێژێکدا لەگەڵ دەخیل شەممۆ لە بەشی کوردی دەنگی ئەمەریکا لەم بارەیەوە دەڵێت بەرپـرسانی ئێران دەیانەوێت وەهای نیشان بدەن کە دەتوانن بەسەر ئەم کۆسپەشدا سەرکەون، بەڵام ڕاستیـیەکەی ئەوەیە ئابوری ئێران ئابوریـیەکی ماندووە و ژێرخانی ئابوریـیەکەی لەم دوو سێ ساڵەی دوایی چەندین قەیرانی گەورەی لێدەرکەوتووە، بۆیە ئەگەر ئەمەریکا بە ڕژدی سزاکانی بسەپێنێت، ئەوا شیانی هەیە ئابوری ئێران هەرەسبهێنێت.
