بەپـێی ڕاپـۆرتە هەواڵیـیەکان چەکدارانی داعش دوو پەلاماری کیمیاویان لە شاری تازە ئەنجامداوە کە دەکەوێتە نزیکەی 20 کیلۆمەتر لە باشوری خۆرهەڵاتی شاری کەرکوک لەسەر ڕێگای سەرەکی کەرکوک و بەغدایە.
لەم بارەیەوە نازم کەهیە ئەندامی ئەنجومەنی ناحیـیەی تازە خورماتوو لە وتووێژێـکدا لەگەڵ حەیدەر کەریم لە بەشی کوردی دەنگی ئەمەریکا دەڵێت ڕۆژی 8 ی مانگی سێ لە کاژمێر 4 ی پاش نیوەڕۆ داعش دەسـتیکرد بە بۆردومانکردنی شارۆچکەی تازە خورماتوو بە 42 کاتیۆشا کە لە دوایـیدا دەرکەوت گازی خەردەل و فسفۆریان تیادا بووە. دەشڵێت لەکامدا کچێـک گیانی لەدەسـتداوە و 670 کەسی دیکە زیانیان پـێگەیشتووە کە هەندێـکیان باری تەندروستیـیان باش نیـیە و ڕەوانەی نەخۆشخانەکانی بەغدا کراون. جەختی لەوەش کرد کە تیمێـکی ئەڵمانی و تیمێـکی ئەمەریکایی پشـتڕاستیان کردووەتەوە کە هێرشی کیمیاوی بووە.
پاشان گوتی 75% ی دانیشـتوانی شارۆچکەی تازە خورماتوو هەموویان ماڵ و حاڵی خۆیان جێهێشتووە لە ترسی بۆردومانی کیمیاوی داعش.
