وەزیری دەرەوەی عێراق فوئاد حسێن دوای کۆتای هاتنی کۆبوونەوەکەی هاوپەیمانێتی ناتۆ لە واشنتن بە ڕۆژنامەنووسانی وت عێراق و تورکیا بە مەبەستی گفتوگۆکردن لەسەر ئۆپەراسیۆنەکانی هێزەکانی تورکیا لە هەرێمی کوردستان کۆدەبنەوە.
وتیشی تاوەکو ئێستا هیچ هێرش و ئۆپەراسیۆنێک ئەنجام نەدراوە و ئەوەی هەیە تەنها چەند جمووجۆڵێکە کە لە ساڵی 1991 ەوە ئەو جمووجۆڵانە بوونیان هەیە.
وتیشی مانگی داهاتوو لە 15 ی مانگی هەشتدا شاندێکی باڵای تورکیا و عێراق کۆدەبنەوە و تاوتوێی پرسە ئاسایشی و سیاسییەکان دەکەن.
ئاماژەشی بەوەدا لەگەڵ لایەنەکانی تورکیادا بەردەوام دیدارییان هەیە و لە واشنتنیش لەگەڵ هاکان فیدانی وەزیری دەرەوەی تورکیادا کۆبووەتەوە.
فوئاد حسێن بە ڕۆژنامەنووسانیشی وت لە ماوەی کۆبوونەوەکەی ناتۆدا چەندین گفتوگۆ و کۆبوونەوەیان لەگەڵ هاوپەیمانان و وڵاتانی دۆستی عێراق کردووە، بە تایبەتی لەگەڵ وەزارەتی خەزێنەی ئەمەریکادا.
وتیشی تاوتوێی پەیوەندییەکانی عێراق لەگەڵ وڵاتانی ناتۆ و جەنگەکەی ناو غەززە و دۆخی سەربازیی عێراق کراوە. ئەوەشی خستەڕوو بابەتی سەرەکی گفتوگۆکان پرسە ئابووریی و سیاسییەکان بوون.
وتیشی لەگەڵ وەزیری بەرگری ئەمەریکا لوەید ئۆستنیشدا کۆبوونەتەوە و چاوی کەوتووە بە وەزیرانی دەرەوەی کوەیت و بەحرەین و ئەمەریکا و چەند وڵاتێکی دیکەش.
فوئاد حسێن: مانگی داهاتوو لەگەڵ تورکیادا لەسەر ئۆپەراسیۆنەکان قسە دەکەین
