ئەندامێکی پەرلەمانی عێراق، ئاماژە بەوە دەکات نەفەسی کارکردنی هێزە شیعەکان، نەفەسی پەراوێزخستنی هێز و پێکهاتەکانی ترە، جەخت لەسەر ئەوەش دەکاتەوە، شیعە سەرکەوتوو بووە لە لاوازکردنی سونە، هەنگاوی داهاتووی بۆ لاوازکردنی کوردە و دواتر مشت و مڕ لە نێو خۆشیاندا سەرهەڵدەدات.
لەم گفتووگۆیەدا لەگەڵ دەنگی ئەمەریکا، شێرکۆ میروەیس دەڵێت"هێزەکان لەبری هەوڵدان بۆ بیناکردنەوەی عێراق، لە کێشمەکێش و هەوڵدان بۆ تەسفیەکردنی یەکتر، لە ڕابردوودا ڕۆڵی سونە لاوازکرا، ئێستا هەوڵەکان بۆ لاوازکردنی پێگەی کوردە، هەنگاوی داهاتوو، کێشمەکێش لە نێوان لایەنە شیعیەکاندا دەبێت لەسەر دەسەڵات."
جەختیشیکردەوە"دەستور، گرێبەستێکی سیاسی کۆمەڵایەتیە، بۆ ئیدارەدانی وڵات و زۆرینەی عێراقیەکان دەنگیان بۆ داوە، کەچی کاری پێناکرێت."
سەبارەت بە هەنگاوەکانی داهاتووی هێزە شیعیەکان بۆ لاوازکردنی پێگەی کورد، شێرکۆ میروەیس وتی"هەنگاوەکانی تر، مەسەلەی یاساو ڕێساکانە کە پێویست بوو کاریان لەسەر بکرێت، ئەو ماددانەی پەیوەندیان بە کوردەوە هەیە، بە هیچ جۆرێک دەنگیان بۆ نەدراوە، نەفەسەکە نەفەسی چارەسەرکردن نیە، ئەمەش قەلەقی زۆری دروستکردووە بۆ کورد و سونە و بەشێک لە شیعەکانیش، هەر هێزێک دێتە پێشەوە، هەوڵی خۆ بەهێزکردن دەدات، نەک پابەندبوون بە دەستور."
بەبڕوای پەرلەمانتارەکەی عێراق، لە بەرامبەر هەوڵی شیعەکاندا بۆ لاوازکردنی پێگەی کورد، ئەو گرفت و پەرتەوازییەی لە نێوان لایەنە کوردیەکان لە هەرێم هەیە، بۆ بەغداش گواستراوەتەوە، وتی"وەکو هێزە کوردیەکان، ئەوەندەی چاومان لەسەر لاوازکردنی یەکتری و خۆ بەهێزکردنە، چاومان لەسەر هەماهەنگی یەکتری نیە، بۆیە دۆخی کوردستان ڕەنگدانەوەی لەسەر ئەدای فراکسیۆنە کوردیەکان لەبەغدا هەبووە."
دەربارەی هەبوونی پەیوەندی لە نێوان فراکسیۆنە کوردیەکان و دابڕانیان لە یەکتری، شێرکۆ میروەیس دەڵێت"لە زۆر مەسەلەدا قسەو باس و ڕاگۆڕینەوە هەیە لە نێوان فراکسیۆنە کوردیەکان، بەڵام فراکسیۆنەکان زیاتر سیاسەتی حیزبەکان جێبەجێ دەکەن، حیزبەکانیش لە گۆشەنیگای جیاوازەوە خوێندنەوە بۆ دۆخی عێراق دەکەن، ژوورێکی هەماهەنگی نیە، تا بتوانین پێکەوە ئامادەکاری بۆ ئەو یاسا و ڕێسایانە بکەین، کە پەیوەندیان بە چارەنوسمانەوە هەیە و یەکدەنگ بین لەسەریان."
لە کۆتایی گفتووگۆکەیدا لەگەڵ دەنگی ئەمەریکا، شێرکۆ میروەیس ئەندامی پەرلەمانی عێراق، یاسای دادگای فیدراڵی بە مەترسی بۆ ئایندەی عێراق ناوبرد، جەختیکردەوە"هێزە شیعیەکان لەسەر بنەمای زۆرینە دەیانەوێت یاساکان تێپەڕێنن، نەفەسی شیعە، نەفەسی پەراوێزخستنی ئەوانی ترە، عێراق لە گۆڕەپانەکەدا غائیبە و ئەجێندای وڵاتانی تر بەسەر گۆڕەپانی سیاسی عێراق زاڵە."
