قەیرانە سیاسی و ئابوروییەکانی هەرێمی کوردستان و گرفتەکانی هێزەکانی ئۆپۆزسیۆن و وردبونەوە لەگرفتە هەرە جومگەیی و یاسایی و سیاسییەکانی کوردستان تێکڕا راماندەگرێت لەبەردەم کۆمەڵێک پرسی گرنگدا؛ کە شارەزایان و شرۆڤەکاران و ئەکادیمیانی ناوەو دەرەوەی هەرێمی کوردستان بە پەرۆشەوە پڕۆژەو رەخنەکانیان لەڕێی دەنگی ئەمریکاوە دەخەنە بەردەم رایگشتی.
تاکەی هەرێمی کوردستان لەناو ئەو قەیرانە گەورانەدا دەژی؟ پاشەرۆژی ئۆپۆزسیۆن بەرەو کوێ دەچێ و ئایا لەڕووی زانستی و سیاسی و پرینسیپە بنچینەییەکانی ئۆپۆزسیۆنبوونەوە شتێک هەیە بەناوی ئۆپۆزسیۆنەوە؟ پارتێکی سیاسی بە سەرۆکایەتی ئیمانوێڵ ماکرۆن تەنها تەمەنی یەک ساڵەو توانی شکست بە دوو پارتی گەورەو 50 ساڵەی فەرەنسا بهێنێت و دەسەڵات بگرێتە دەست: ئایا چەند شیانی ئەم مۆدێلەی ماکرۆن لە رۆژهەڵاتی ناوەڕاست و هەرێمی کوردستاندا بوونی هەیە و دەبێت؟
ئاسۆ جەبار بۆ هەفتەنامەی رەهەندەکانی دەنگی ئەمریکا وتووێژێکی لەگەڵ دادوەر و مامۆستای زانستی یاسای دەستوریی لەزانکۆی گەشەپێدان دکتۆر حاکم لەتیف موستەفا سازکردووە....
حاکم لەتیف دەڵێت "من 15 بۆ 20 ساڵە دەڵێم ئەمەی ناوتان ناوە ئەزمونی هەرێمی کوردستان، بناغەیەکی ئەوتۆی نیە و بە میزاجی کەسی و بە بڕیاری چەند کەسێک بەڕێوەدەچێت".
دەشڵێت "حکومەت؛ پەرلەمانی داخستووە، کە لە هەموو دنیادا شتی وا نیە، لەکاتێکدا حکومەت رەوایەتی لەپەرلەمانەوە وەردەگرێت".
هاوکات دەڵێت "حکومەتی هەرێم شەرعییەتی نەماوە؛ چونکە روپۆشە یاساییەکەی کە بریتییە لەپەرلەمانی کوردستان لەسەر دەستی حکومەت پەکخراوە".
سەبارەت بە دادگاو سەروەری یاساش حاکم شێخ لەتیف پێیوایە "بەداخەوە لەکوردستاندا دادگاکانمان بەشێوەیەکی شکڵین، بەڵام دەسەڵاتی دادوەری و ئەنجومەنی دادوەریی و دادگاکانیش سەروەرنین و بڕیارەکانیان جێبەجێناکرێت".
دەشڵێت "تا ئێستا خزمی بەرپرسێکی سیاسی لەهەولێر کە لەسەر فول لایت خەڵکی کوشتووەو دەستگیر نەکراوە".
هاوکات دەشڵێت؛ نەوەدەکان باشتر بوو لەئێستا و ساڵانی دووهەزارەکان. سەبارەت بە حوکمڕانی لەهەرێمەکەدا حاکم لەتیف دەڵێت "ئەمانەی کە ئێستا حوکمڕانی دەکەن بەهیچ شێوەیەک عەقڵییەتی حوکمڕانیان نیە. پیاوی دەوڵەتداری نین".
دەشڵێت "دوو دەرەبەگایەتی سیاسیمان هەیە، هەرێمێک لەهەولێر حکومڕانی دەرەبەگایەتییەکی سیاسی دەکات. لەسلێمانیش دەرەبەگایەتییەکی سیاسی تر حوکمڕانی دەکات. ئەم دوو دەرەبەگایەتییە یان ئەم دوو میرنشینە، هەریەکەیان سەر بە وڵاتێکێن. یەکێکیان سەر بە باڵادەستی تورکیایە؛ ئەوی دیکەش سەر بە ئێرانە".
حاکم شێخ لەتیف کۆمەڵێک رەخنەی جومگەیی لە بزوتنەوەی گۆڕان دەگرێت و دەڵێت "لە 2013 ەوە کاتێک بزوتنەوەی گۆڕان بەو پێیەی کە گەورەترین هێزی ئۆپۆزسیۆن بوو بۆ خەڵک. وە خەڵکیش زیاتر ئومێدیان لەسەر ئەوان هەڵچنی بوو. بەشداری دەسەڵاتی کرد، گۆڕان هەڵەیەکی ستراتیژی کرد".
دەشڵێت "گۆڕان کە لە 2009 دا دروستبوو، هەموو هێزە ناڕازییەکان و دەنگە ناڕەزاییەکانی بۆخۆی هەڵمژی و هەروەها دروشم و ناڕەزایی خەڵکی بەرزکردەوەو بوو بە جێی ئومێدێک. بەڵام خەڵک تا سەر چاوەڕوانی گۆڕان ناکات".
لەم وتووێژەدا گوێدەگرن لە کۆمەڵێک تەوەر و پێشنیاری دەستوریی و یاسایی و سیاسی.......
