ئەمڕۆ چوارشەممە لە شاری سلێمانیدا مامۆستایەکی ئاینیی گیانی لەدەستدا و وەزارەتی تەندرووستی هەرێمی کوردستان باس لەوە دەکات کە تووشبووی ڤایرۆسی کۆرۆنا بووە، بەڵام وەزارەتی تەندرووستی عێراق گومانی لەوە هەیە مامۆستا ئاینییەکە بەهۆی ڤایرۆسی کۆرۆناوە گیانی لەدەستدابێت.
ڕەشید عەبدولڕەحمان مامۆستایەکی ئاینیی تەمەن ٦٣ ساڵ بوو لە شاری سلێمانی و پێشنوێژی مزگەوتی مەحوی بوو. لەگەڵ گیان لەدەستدانیدا، وەزارەتی تەندرووستی هەرێمی کوردستان لە ڕاگەیاندراوێکدا ڕایگەیاند "بەداخەوە یەکەمین نەخۆشی ڤایرۆسی کۆرۆنای نوێی تەمەن ٦٣ ساڵ لە هەرێمی کوردستان گیانی لەدەستدا." هەروەها یاد نەقشبەندی، وتەبێژی بەڕێوەبەرایەتی تەندرووستی سلێمانی وتی "مامۆستا ئاینییەکەی سلێمانی کە تووشی کۆرۆنا بوو، گیانی لەدەستدا."
دەنگی ئەمەریکا بە مەبەستی بەدواداچوون بۆ ئەم ڕووداوە سەردانی مزگەوتی مەحوی کرد کە لە شوێنێکی قەرەباڵەخی ناو شاردایە و لەوێدا نوێژخوێنێکی بەردەوامی مزگەوتی مەحوی بەناوی عوسمان مستەفا بۆ دەنگی ئەمەریکا دوا و باسی لەوە کرد مامۆستا ئاینییەکەی بەدەست چەندین نەخۆشی جۆراجۆرەوە ناڵاندوویەتی.
لەکاتێکدا دەنگۆی ئەوە بڵاوبوویەوە گوایە ئەم مامۆستا ئاینییەی پێش ١٠ ڕۆژ لە کۆماری ئیسلامی ئێران گەڕاوەتەوە، لێپرسراوی ئەنجوومەنی سلێمانی لقی زانایان، مامۆستا نەجمەدین، لە لێدوانێکیدا باسی لەوە کرد مامۆستا ئاینییەکە لە ماوەی ٣ ساڵی ڕابردوودا سەردانی ئێرانی نەکردووە.
ئەمە لە کاتێکدایە د. سەیف بەدر، وتەبێژی وەزارەتی تەندرووستی عێراق ڕاگەیاندراوێکدا باس لەوە دەکات "دوای تۆمارکردنی پێنج حاڵەت لە سلێمانیدا گومان هەبوو کەسێکی بەساڵاچوو تووشی کۆرۆنا بووبێت، بەڵام دوای ئەنجامدانی چەندین پشکنینینی ورد باری تەندرووستی تێکچوو و گیانی لەدەستدا. بەڵام وەک وەزارەتی تەندرووستی هێشتا ئاگادار نین کە گیان لەدەستدانەکەی بەهۆی نەخۆشی کۆرۆناوەیە یان نا. هەروەها لایەنە پەیوەندیدارەکان کاری پێویست دەکەن بۆ دڵنیابوون لە حاڵەتەکە."
هەموو ئەمانە لە کاتێکدایە چاوەڕوان دەکرێت وەزارەتی تەندرووستی هەرێمی کوردستان ڕاگەیاندراوێک بڵاوبکەتەوە لەسەر مردنی ئەو مامۆستا ئاینییەی کە گومان دەکرێت لەوەی بەهۆی ڤایرۆسی کۆرۆناوە گیانی لەدەستدابێت.
