لەم هەفتەیەدا دوو تەقینەوەی یەک بە دوای یەک لە بەردەم قەڵای دیموکرات کە دەفتەری سیاسی حزبی دیموکراتی کوردسـتانی لێـیە لە شاری کۆیە ڕوویانداوە و بەهۆیەوە 5 پـێشمەرگەی حزبی دیموکراتی کوردسـتان و 2 کارمەندی ئاسایشی گیانیان لەدەسـتداوە.
خەسرەو ئەڵماسی نووسەر و لێکۆڵەر لە وتووێژێـکدا لەگەڵ بەڵێن ساڵح لە بەشی کوردی دەنگی ئەمەریکا دەڵێت ئەم هێرشانەی کرانە سەر بارەگاکانی حزبی دیموکراتی کوردستان، کاردانەوەیەکی ئەو چالاکیـیانە بووە کە بەم دوایـیانەدا لە گۆڕەپانی خەباتی سیاسی و نیزامی کوردسـتانی ڕۆژهەڵات هاتوونەتە ئاراوە.
دەشڵێت کاربەدەسـتانی پلە بەرزی سەربازی و ئەمنی کۆماری ئیسلامی ئێران هەڕەشەی توندیان لە حزبەکانی ڕۆژهەڵاتی کوردسـتان کردبوو و تەنانەت ڕایانگەیاندبوو ئەوان بۆ بەرپەرچدانەوەی ئەم جۆرە چالاکیـیانە هیچ هێڵێـکی سوور بۆخۆیان نابینن و سەرکردایەتی و هێزەکانی ئەو حزبانە لە هەرکوێـیەکی دنیادابن، ئەوا دەکەونە بەر هێرش و پەلاماری ئەوان.
