ئەندامی سەرکردایەتی یەکگرتووی ئیسلامی کوردستان، ئەبوبەکر ھەڵەدنی ھۆکاری دەنگنەدانیان بە کابینەی نوێی حکومەتی ھەرێمی کوردستان بەسەر سێ خاڵدا دابەش دەکات و دەڵێ:
ئێمە ھێزێکی ئۆپۆزیسیۆنین، ئۆپۆزیسیۆنیش چاودێری حکومەت دەکات نەک متمانەی پێبدات. دووەمیش: پێمانوایە بەشێک لەو دەموچاوانەی جارێکی دیکە کە کاندیدن لە پۆستەکانی حکومەت ھەر خۆیان ھۆکاری قەیرانەکانی حکومەتی ھەرێم و ئەو نەھامەتییانەن لە 27 ساڵی رابردوودا بەسەر خەڵکی ھەرێمی کوردستاندا ھاتووە. سێیەمیش: عەقڵییەتی حوکمڕانی لە ھەرێمی کوردستاندا گۆڕانی بەسەردا نەھاتووە و ئەو تێڕوانینەی کە بۆ شکستی حکومەت لە رابردوودا ھەمانبووە، ھەر لە جێگەی خۆیەتی و پێناچێت ئەم کابینە تازەیەش پەند و وانەی لە رابردوو وەرگرتبێت. دەشڵێ: ئێمە لەمەودوا تەنیا رەخنە ناگرین، بەڵکو چاودێری حکومەتیش دەکەین و پڕۆژەی چاکسازیشمان پێشکەش بە سەرۆکایەتی پەرلەمان کردووە و بەھیواین بیخەنە ناو بەرنامەی کارەوە.
لەماوەی رابردوودا، زۆر جار سەرۆکی فراکسیۆنی یەکگرتوو د.شێرکۆ جەودەت رەخنەی لە وەزیری سامانە سروشتییەکان ئاشتی ھەورامی دەگرت، دەنگی ئەمریکا لەو ئەندامەی سەرکردایەتی یەکگرتوو دەپرسێ: ئێستا کە ئاشتی ھەورامی کاندیدی وەزارەتی سامانە سروشتییەکان نییە پێتوایە ئەم کابینەیە بەرەو گۆڕان و چاکسازی ھەنگاو دەنێ؟
لە وەڵامدا ئەبوبەکر ھەڵەدنی گوتی: لای ئێمە سیستەم گرینگە ھەرچەندە کەسایەتییەکانیش جێ پەنجەیان دیارە، ئێمە پێمانوایە ئاشتی ھەورامی ھۆکارێکی شکستخواردنی دۆسییەی نەوتە لە ھەرێمی کوردستاندا و بۆیە داواکارین یاسای نەوت ھەموو بڕگە و بابەتەکانی وەک خۆی جێبەجێبکرێن و پەلە بکرێ لە رێکخستنەوەی ھەموو ئەو کۆمپانیا و دەستانەی کە تایبەتن بە دەرھێنان و بە بازاڕخستن و فرۆشتی نەوتەوە و لە ناویاندا یاسای سندووقی داھاتەکانی نەوت و گاز جێبەجێبکرێ، وە ئێمە ھەڵنەبژاردنەوەی ئاشتی ھەورامی بە ھەنگاوێکی ئەرێنی دەزانین و بە ھیواین ئەم کابرایە خۆی لەبەردەم یاسادا ببینیتەوە، چونکە ھەر ئەو بووە ھۆکاری ئەوەی بۆ ھاوڵاتیانی ھەرێمی کوردستان نەوت ببێتە بەڵا نەک نیعمەت .
تەواوی گوتووێژەکە لەم فایلە دەنگییەی خوارەوە گوێبیست بن.
