دەزگایەکی ڕاگەیاندنی ڕووسیا بڵاویکردەوە کرێملن دەڵێت هەڵبژاردنەکانی نیوەی خولی ئەمەریکا پەیوەندییە " خراپەکانی " نێوان مۆسکۆ و واشنتن باش ناکاتەوە، ئەوەشی ڕەت کردەوە ڕووسیا دەستوەربداتە هەڵبژاردنەکانی ئەمەریکاوە.
دەزگای ڕاگەیاندنی ئاڕ ئای ئەی نۆڤۆستی ڕووسیا لە زاری وتەبێژی کرێملن دمیتری پێسکۆڤەوە بڵاویکردەوە " ئەم هەڵبژاردنانە گرنگن، بەڵام پێویست ناکات زیادەڕۆیی بکرێت لە گرنگییاندا بۆ پەیوەندییەکانی نێوانمان."
وتیشی " ئەم هەڵبژاردنانە ناتوانن هیچ شتێکی گرنگ بگۆڕن. پەیوەندییەکان هێشتا خراپن و هەر بە خراپیش دەمێننەوە."
پێسکۆڤ وتی مۆسکۆ ڕاهاتووە بە بیستنی بەو قسانەی کە دەڵێن ڕووسیا دەستوەردەداتە هەڵبژاردنەکانی ئەمەریکاوە و گوێ ناداتە ئەو تۆمەتانەی کە لەمدواییانەدا ئاڕاستەی ڕووسیا کراون.
پێسکۆڤ بە ڕۆژنامەنووسانیشی وت هێشتا زۆر زووە باس لە گفتوگۆ بکرێت لەگەڵ ئەمەریکادا سەبارەت بە درێژکردنەوەی پەیماننامەی ستارتی چەکی ئەتۆمی.
سەرچاوە/ ڕۆیتەرز
کرێملن: هەڵبژاردنەکانی نیوەی خولی ئەمەریکا پەیوەندییە خراپەکانی نێوان مۆسکۆ و واشنتن ناگۆڕێت
