وەزیری دەرەوەی ڕووسیا لە کۆنفرانسێـکی ڕۆژنامەوانی لە پەراوێزی کۆبوونەوەکانی کۆمەڵەی گشتی نەتەوە یەکگرتووەکان لە نیویۆرک گوتی ڕووسیا ئامادەیە چەک بە پـێشـمەرگە بدات کە شەڕی میلیتانەکانی داعش دەکەن، ئەمەش بە ڕێگای ئاگادارکردنەوەی حکومەت لە بەغدا.
ئایا حکومەتی هەرێمی کوردستانی عێراق ڕاستەوخۆ داوای لە ڕووسیا کردووە چەکی پـێبدات بۆ شەڕی دژی داعش و ئایا هەتا ئێسـتا هێچ چەکی لە ڕووسیاوە پـێگەیشتووە؟
بۆ وەڵامدانەوەی ئەم پـرسیارانە حەیدەر کەریم بە بەشی کوردی دەنگی ئەمەریکا وتووێژی لەگەڵ جەبار یاوەر ئەمینداری گشـتی وەزارەتی پـێشمەرگەی هەرێمی کوردسـتانی عێراق کردووە.
دەڵێت بە بەردەوامی لە لایەن وڵاتانی هاوپەیمانی بە ڕابەرایەتی ئەمەریکا چەک و تەقەمەنی بۆ پـێشـمەرگە هاتووە، بەڵام زۆر جار نە جۆرەکەی زۆر باش بووە و نە بڕەکەشی زۆربووە بە بەراورد بەو شەڕە گەورەیە، بەڵام لەگەڵ ئەوەشدا زۆر هاوکاری کردوون لە شەڕی دژی داعش.
پاشان دەڵێت هەتا ئێسـتا لە ڕووسیاوە هیچ کۆمەکێـکی چەک و تەقەمەنی بۆ هێزەکانی نەهاتووە، بەڵام یەک جار کۆمەکی مرۆیی بۆ هاوڵاتیانی ئێزیدی شەنگال ناردووە.
