ڕووسیا کۆتەبەند دەخاتە سەر ڤیزای " ئەو وڵاتانەی دۆستی ڕووسیا نین "

وەکو وەڵامێک بۆ سزاکانی سەر وڵاتەکە، سەرۆکی ڕووسیا ڤلادیمیر پوتن بڕیارێکی واژۆ کرد تیایدا کۆتەبەند دەخاتە سەر پێدانی ڤیزا بە هاوڵاتیانی ئەو وڵاتانەی کە مۆسکۆ " بە دۆستی ڕووسیایان نازانێت."

بڕیارەکە کە ڕۆژی دووشەممە جێبەجێ دەکرێت، ئەو ئاسانکارییانە هەڵدەوەشێنێتەوە کە ڕووسیا لە پێدانی ڤیزادا بە هاوڵاتیانی وڵاتانی وەکو نەرویج و سویسرا و دانیمارک و ئایسلەندا کردبوونی.

هەروەها فەرمانیش بە وەزارەتی دەرەوەی ڕووسیا و دامەزراوە حکومییەکانی دیکەی وڵاتەک دەکات کۆتوبەند بخەنەسەر هاتنی تایبەتی " هاوڵاتیانی بیانی و ئەو کەسانەی دەوڵەتیان نیە و کردەوەی نادۆستانە دژی ڕووسیا ئەنجام دەدەن."

مانگی ڕابردوو حکومەتی ڕووسیا ناوی ئەو وڵاتانەی ئاشکرا کرد کە دۆستی ڕووسیا نین، لەنێو ئەو وڵاتانەشدا ئەمەریکا و کەنەدا و بەڕیتانیا و وڵاتانی یەکێتی ئەوروپا و ئۆکرانیایان تێدا بوو.

لە 24 ی مانگی دوودا ڕووسیا دەیان هەزاران سەربازی ڕەوانەی ناو ئۆکرانیا کرد و داگیرکارییەکەی لەو وڵاتە بە " ئۆپەراسیۆنێکی سەربازیی تایبەت " لە قەڵەمدا، وتیشی مەبەست لە ئۆپەراسیۆنەکەی لەناوبردنی توانا سەربازییەکانی ئۆکرانیا و لەناوبردنی " نەتەوە پەرستە " مەترسیدارەکانی ئۆکرانیایە.

سەرچاوە/ ڕۆیتەرز