وەزیری دەرەوەی ئەمەریکا رێکس تیلەرسن وتی واشنتن ئامادەیە بۆ ئەنجامدانی گفتوگۆ لەگەڵ کۆریای باکووردا دوای ئەوەی کیم جۆنگ ئون هەڕەشەکەی بۆ لێدانی دوورگەی گوامی ئەمەریکا دواخست.
تیلەرسن وتی " ئێمە بەردەوامین لەوەی رێگە چارەیەک بدۆزینەوە لەڕێی گفتوگۆکردنەوە، بەڵام ئەوە بەندە بە کیم جۆنگ ئونەوە."
واشنتن وتی پیۆنگیانگ دەبێت واز لە تاقیکردنەوە موشەکی و ناوەکییەکانی بهێنێت پێش ئەوەی گفتوگۆکان سەبارەت بە ڕەوشەکەی نیمچە دوورگەی کۆریا دەست پێبکات.
وتەبێژی وەزارەتی دەرەوەی ئەمەریکا هێثەر ناورێت وتی " کیم جۆنگ ئون، ئێمە دەمانەوێت گفتوگۆی لەگەڵدا بکەین، کاتێک کە کاتەکە گونجاو بێت، کاتێک کە ئەوان پیشانمان بدەن کە جددیین لەوەی واز لە بەرنامە ناوەکییەکەیان بهێنن."
ناورێت وتیشی " هێشتا ئەوەمان نەبینیوە." و ئاماژەی بە تاقیکردنەوە ناوەکییەکانی ساڵی ڕابردوو و دوو تاقیکردنەوە موشەکییە بالیستیکیە کیشوەرییەکەی مانگی رابردووی کۆریای باکوور کرد.
سەرچاوە/ VOA