وەزارەتی دەرەوەی ئەمەریکا ڕایگەیاند وەزیری دەرەوەی وڵاتەکە ئەنتۆنی بلینکن ڕۆژانی دووشەممە و سێشەممە سەردانی سعودیە دەکات و لەگەڵ هاوبەشەکانی ئەمەریکا لە ناوچەکەدا کۆدەبێتەوە و تاوتوێی هەوڵەکان دەکەن بۆ بە دەستهێنانی ئاگربەستێک لە غەززە و ئازادکردنی بارمتە ئیسڕائیلییەکان.
وتەبێژی وەزارەتی دەرەوەی ئەمەریکا ماثیۆ میڵەر لە بەیاننامەیەکدا وتی " بلینکن تاوتوێی زیادبوونی یارمەتییە مرۆییەکان دەکات لەمدواییانەدا بۆ غەززە و تیشک دەخاتە سەر گرنگیی دڵنیابوونەوە لەوەی ئەو زیادبوونە بەردەوام بێت."
وتیشی " وەزیر جەختیش لە گرنگی ڕێگریکردن لە پەرەسەندنی ململانێکە دەکاتەوە و تاوتوێی هەوڵەکان دەکات بۆ بە دەستهێنانی ئاشتی و ئاسایشێکی هەمیشەیی لە ناوچەکەدا، لە ڕێی ڕێگایەکیشەوە بۆ دەوڵەتێکی سەربەخۆی فەلەستینی و گرەنتی ئاسایش بۆ ئیسڕائیل."
میڵەر وتی لە ماوەی سەردانە دوو ڕۆژەییەکەیدا بلینکن بەشداری کۆبوونەوەیەکی وەزیرانی ئەنجومەنی هاریکاری کەنداو دەکات، کاردەکات بۆ بەرەوپێشبردنی هەماهەنگییەکانی ئاسایش لە ناوچەکەدا.
سەرچاوە/ ڕۆیتەرز
وەزیری دەرەوەی ئەمەریکا سەردانی عەرەبستانی سعودیە دەکات
