کرێملن: هۆکار هەن بۆ ئەوەی گەشبین بیت سەبارەت بە ڕێککەوتنی ئاگربەست

وتەبێژی کرێملن دمیتری پێسکۆڤ ڕۆژی هەینی وتی هۆکار هەن بۆ ئەوەی " بە وریاییەوە گەشبین " بیت سەبارەت بە ڕێککەوتنی پێشنیارکراوی ئاگربەست لە نێوان ڕووسیا و ئۆکرانیادا، ئەمەش دوابەدوای گفتوگۆکانی نێوان نوێنەری ئەمەریکا و سەرۆکی ڕووسیا ڤلادیمیر پوتن لە مۆسکۆ.

پێسکۆڤ بە ڕۆژنامەنووسانی وت پوتن پشتگیری شایستەی لە پێشنیارەکەی ئەمەریکا کردووە بۆ ئاگربەست و وەستاندنی جەنگەکەی ڕووسیا لەگەڵ ئۆکرانیادا بۆ ماوەی 30 ڕۆژ، بەڵام وتوویەتی کە هەندێک پرسیار هەن دەبێت وەڵام بدرێنەوە.

پێسکۆڤ وتی " لە کاتێکدا کە کاری زۆر ماوە بکرێت، " پوتن " پشتگیری شایستەی خۆی بۆ هەڵوێستی سەرۆکی ئەمەریکا دانۆڵد ترامپ دەربڕیوە." وتی پوتن درەنگانێکی پێنجشەممە لەگەڵ نوێنەری تایبەتی ئەمەریکا ستیڤ ویتکۆفدا کۆبووەتەوە و پوتن " زانیاری زیاتر و ئاماژەی زیاتری بۆ سەرۆک ترامپ ناردووە."

وتەبێژەکەی کرێملن وتی هەردوولا ڕێککەوتوون لەسەر ئەوەی پوتن و ترامپ دەبێت قسە بکەن، وتیشی هەر کە ویتکۆف زانیارییەکانی گەیاند بە ترامپ ئەوا کاتی گفتوگۆکە دیاری دەکرێت.

سەرۆکی ئۆکرانیا ڤلۆدیمیر زێلێنسکی ڕۆژی پێنجشەممە لە وتارێکیدا وتی لێدوانەکانی پوتن " زۆر فێڵبازانە " بوون و پێی وایە پشتگیرییە شایستەکەی پوتن بۆ پلانەکەی ئەمەریکا هەوڵێکە بۆ دانانی بنەمایەک بۆ ڕەت کردنەوەی.

زێلێنسکی وتی " ئەو ' پوتن ' لە ڕاستیدا لە ئێستادا ئامادەکاری دەکات بۆ ڕەتکردنەوە، چونکە پوتن بێگومان دەترسێت بە سەرۆک ترامپ بڵێت کە دەیەوێت بەردەوامی بدات بەم جەنگە، دەترسێت پێی بڵێت کە دەیەوێت ئۆکرانیاییەکان بکوژێت." ئاماژەی بەوەدا ئۆکرانیا پێشنیارەکەی ئەمەریکای پەسەند کردووە و ئامادەیە بۆ ڕێکخستنی چاودێریکردن و پشتڕاست کردنەوە.

زێلێنسکی وتی " ئێمە مەرجێک دانانێین کە پڕۆسەکە ئاڵۆز بکات، ڕووسیا ئەوە دەکات."

وتەبێژی کۆشکی سپی کارۆلین لیڤیت ڕۆژی هەینی وتی بڕیار لەسەر هیچ گفتوگۆیەک لە نێوان سەرۆک ترامپ و پوتندا نەدراوە، بەڵام وتی ئەوە دەکرێت بگۆڕێت.

وتیشی سەرۆک ترامپ فشاری خستووەتە سەر ڕووسیاییەکان " بۆ ئەوەی شتە ڕاستەکە بکەن." وتی گفتوگۆکانی ڕۆژی پێنجشەممە لە مۆسکۆ " ڕۆژێکی بەسوود بووە بۆ ئەمەریکا و جیهانیش لە ڕووی ئاشتییەوە."

ڕۆژی پێنجشەممە لە کۆشکی سپی، پێش گفتوگۆکان لەگەڵ سکرتێری گشتی ناتۆ مارک ڕوتدا، سەرۆک ترامپ وتی " زۆر نائومێدکار " دەبێت ئەگەر ڕووسیا دواجار هەوڵەکانی ئەمەریکا بۆ کۆتایی هێنان بە شەڕەکە ڕەت بکاتەوە.

هاوکات وەزارەتی بەرگری بەڕیتانیا ڕۆژی هەینی وتی ڕووسیا دابینکردنی پارەی بۆ جەنگەکە کردووەتە ئەرکێکی پێشینە و ئەوەش بووەتە هۆی کەمبوونەوەی پارە بۆ تێکڕای چاودێری تەندروستی ڕووسیاییەکان و بووەتە هۆی کەمبوونەوەی کارمەندانی تەندروستی و پێداویستییەکان.

لە ڕاپۆرتە هەواڵگرییە بەرگرییەکەیدا، وەزارەتەکە وتی ڕووسیا گوایە لە ساڵی 2024 دا لانیکەم 160 نەخۆشخانەی داخستووە، بە 18 نەخۆشخانەی منداڵبوون و لانیکەم 10 نەخۆشخانەی منداڵانیشەوە. ڕاپۆرتەکە دەڵێت گوند و شارۆچکە بچووکەکانی ڕووسیا بە تایبەتی زیانییان بەرکەوتووە.

وەزارەتی بەرگری بەڕیتانیا وتی ئەو 500,000 ڕووسیاییەی کە لە جەنگەکەدا بوونەتە قوربانی بە دڵنیاییەوە قورساییەک دەخەنە سەر سیستمی تەندروستی سەربازیی ڕووسیا لەسەر سەرجەم ئاستەکان.

سەرچاوە/ دەنگی ئەمەریکا