ڕۆژی دووشەممە ئەمەریکا سزای سەپاند بەسەر زیاتر لە 30 کەس و کەشتی پەیوەست بە ئێرانەوە، بە سەرۆکی کۆمپانیایەکی نەوتی نیشتیمانی ئەو وڵاتەشەوە، ئەوەش بەهۆی فرۆشتن و گواستنەوەی بارە نەوتی ئێرانییەوە.
وەزیری خەزێنەی ئەمەریکا سکات بەسێنت وتی " ئێران بەردەوامە لە پشتبەستن بە تۆڕێکی نادیاریی کەشتی و بازرگان و فرۆشیارەکان بۆ کارئاسانیکردن بۆ فرۆشتنی نەوتەکەی و دابینکردنی داهاتەکەی بۆ چالاکییە تێکدەرەکانی."
وتیشی " ئەمەریکا هەموو ئامرازەکانی بەردەستی بەکاردەهێنێت بۆ بە ئامانجکردنی هەموو لایەنەکانی زنجیرەی دابینکردنی نەوتی ئێران و هەر کەسێکیش مامەڵە بە نەوتی ئێرانەوە بکات خۆی دەخاتە بەردەم مەترسی سزایەکی گەورەوە."
وەکو ڕووسیا، ئێران پشت بە تۆڕێکی تانکەرەکان دەبەستێت کە نەوت لە کەشتییەکەوە بۆ کەشتییەکی دیکە دەگوازنەوە بۆ دەرەوەی ئاوی ناوچەکە لە پێناو خۆدزینەوە لە سزاکانی ڕۆژئاوا و لەو ڕێگەیەوە سەرچاوەیەکی سەرەکی داهات بۆ ئەو وڵاتە و سوپاکەی دابین دەکەن.
لە نێو ئەوانەدا کە ڕۆژی دووشەممە کراونەتە ئامانج بریتین لە حەمید بۆڤاردییانی جێگری وەزیری پیتڕۆڵیۆمی ئێران و بەڕێوبەری جێبەجێکاری کۆمپانیای نەوتی نیشتیمانی ئێران.
وەزارەتی خەزێنەی ئەمەریکا وتی ئەوانی دیکە کە سزاکانی ڕۆژی دووشەممە گرتوونییەتەوە بریتین لە فرۆشیارانی نەوت لە ئیماڕات و هۆنگ کۆنگ و تانکەر و بەڕێوبەرەکان لە هیندستان و چین.
کەشتییەکانی تۆمەتبار کرد بە تۆمەتی یارمەتیدان لە گواستنەوەی " دەیان ملیۆنان بەرمیل لە نەوتی خاو کە بەهاکەیان دەگاتە سەدان ملیۆنان دۆلار."
خەزێنەی ئەمەریکا ئاماژەی بەوەدا وەزارەتی دەرەوەی ئەمەریکاش سزای سەپاندووە بەسەر 16 کۆمپانیای دیکەدا لەسەر " بەشدارییان لە فرۆشتن و کڕین و گواستنەوەی نەوتی ئێراندا."
سەرچاوە/ فرانس پرێس
ئەمەریکا سزا بەسەر بەڕێوبەرێکی ئێرانی کۆمپانیایەکی نەوتدا دەسەپێنێت
