سەرۆکی ئەمەریکا دانۆڵد ترامپ پلانی هەیە لە ڕۆژی سێشەممەوە باجی گومرگی نوێ بسەپێنێت بەسەر ئەو شتومەکانەی کە لە کەنەدا و مەکسیکەوە هاوردەی وڵاتەکە دەکرێن، بەڵام وەزیری ئابووری ئەمەریکا هاوارد لوتنیک ڕۆژی یەکشەممە وتی ڕەنگە باجی گومرگەکە کەمتر بێت لەو ڕێژەیەی کە سەرۆک ترامپ پلانی بۆ داناوە و لە سەدا 25 ە.
لوتنیک بە فۆکس نیوزی وت " ئەوە دۆخێکی ناجێگیرە."
وتی " لە ڕۆژی سێشەممەدا باجی گومرگ بەسەر مەکسیک و کەنەدادا دەسەپێندرێن. ئەوەی کە چۆن دەبن جێی دەهێڵین بۆ سەرۆک و تیمەکەی بۆ گفتوگۆکردن."
لێدوانەکانی لوتنیک یەکەم ئاماژە بوون لەسەر ئەوەی بەڕێوبەرایەتییەکەی سەرۆک ترامپ ڕەنگە ئەو لە سەدا 25 باجی گومرگە بە تەواوەتی نەسەپێنێت بەسەر سەرجەم ئەو شتومەکانەی کە لە مەکسیک و کەنەداوە هاوردەی ئەمەریکا دەکرێن. ئاماژەی بەوەدا مەکسیک و کەنەدا کاری باشییان کردووە بۆ ڕێگریکردن لە هاتنی دەرمانی هۆشبەر لە سنوورەکانییانەوە بۆ ئەمەریکا.
لوتنیک وتی مەکسیک و کەنەدا " کارێکی بەرپرسانەیان " کردووە لە پاراستنی سنوورەکانییان لەگەڵ ئەمەریکادا، ئەمەش سەرەڕای ئەوەی دەرمانی کوشندەی فینتانیڵ هێشتە دێتە ئەمەریکاوە.
سەرۆک ترامپ مانگێک لەمەوبەر سەپاندنی باجی گومرگی بەسەر ئەو دوو وڵاتەدا سەپاند، بەڵام جێبەجێکردنی بڕیارەکەی دواخست دوای ئەوەی سەرۆکی مەکسیک ڕایگەیاند 10,000 سەرباز ڕەوانەی سنووری باکووری وڵاتەکە دەکات لەگەڵ ئەمەریکادا بە مەبەستی ڕێگریکردن لە هاتنی دەرمانە هۆشبەرەکان بۆ ناو ئەمەریکا، سەرۆک وەزیری کەنەداش جەستن ترودۆ وتی کەسێک دەستنیشان دەکات بۆ مامەڵەکردن لەگەڵ ئەو پرسەدا.
ڕۆژی سێشەممە سەرۆک ترامپ لە سەدا 10 ی دیکە لە باجی گومرگ دەسەپێنێت بەسەر شتومەکی چینیدا، سەرۆک ترامپ چینی تۆمەتبار کردووە بەوەی کە چین سەرچاوەی هێنانی فینتانیڵ بێت بۆ ناو ئەمەریکا.
هەفتەی ڕابردوو لە ماوەی ڕاگەیاندنی سەپاندنی باجی گومرگدا، سەرۆک ترامپ وتی " دەرمانەکان هێشتا بە ئاستێکی زۆر و بە شێوەیەک کە جێی قبووڵکردن نیە لە مەکسیک و کەنەداوە دێنە وڵاتەکەمانەوە. ڕێژەیەکی زۆر گەورە لەم دەرمانانە، زۆربەیان لە شێوازی فینتانیڵدا، لە چین دروستکراون و لەوێشەوە دابین دەکرێن."
وەزیری ئابووری ئەمەریکا دەڵێت باجە نوێیەکانی گومرگی ئەمەریکا لەسەر کەنەدا و مەکسیک دەکرێت کەم بکرێنەوە
