دادگایەکی تێهەڵچوونەوەی ئەمەریکا ڕۆژی سێشەممە داوایەکی هالکبانکی سەر بە دەوڵەتی تورکیای ڕەت کردەوە بۆ وەرگرتنی پارێزبەندی لەو تۆمەتی تاوانانەی کە ئەمەریکا ئاڕاستەی کردووە لەسەر ئەوەی کە یارمەتی ئێرانی داوە خۆی لە سزاکانی ئەمەریکا بدزێتەوە.
دادگای دووی تێهەڵچوونەوەی ئەمەریکا لە مانهاتن وتی هیچ بنەمایەک نیە لە یاسای باودا تاوەکو دامەزراوەیەکی بیانی سەر بە دەوڵەتێک پارێزبەندی تەواو وەربگرێت و بە دووربێت لە سزادانی لەلایەن ئەمەریکاوە لەسەر ئەو تاوانانەی کە گوایە ئەنجامدراون و پەیوەندییان بە چالاکی بازرگانییەوە هەیە.
داواکارانی ئەمەریکا لە ساڵی 2019 دا هالکبانکییان تۆمەتبار کرد بە تۆمەتی ئەوەی گوایە خزمەتگوزارییەکانی پارە و کۆمپانیا سەرەکییەکانی لە ئێران و تورکیا و ئیماڕات بەکارهێناوە بۆ خۆدزینەوە لە سزاکانی ئەمەریکا.
وتییان هالکبانک یارمەتی ئێرانی داوە بە نهێنی 20 ملیار دۆلار لە پارە سڕکراوەکان حەواڵە بکات و داهاتی نەوت بگۆڕێت بۆ زێڕ و پارە بە شێوەیەک کە لە قازانجی بەرژەوەندییەکانی ئێراندا بێت، هەروەها باری خۆراکی ساختەی تۆمار کردووە بۆ پاساو هێنانەوە بۆ حەواڵەکردنی داهاتەکانی نەوت.
هالکبانک دانی نەناوە بە تاوانەکانیدا کە بریتین لە ساختەکاری بانکی و پارە سپیکردنەوە و پلانگێڕی. دۆسییەکە بووەتە چقڵێک لە پەیوەندییەکانی نێوان ئەمەریکا و تورکیادا، سەرۆکی تورکیا ڕەجەب تەیب ئەردۆغانیش دەڵێت تۆمەتەکانی ئەمەریکا هەنگاوێکی " نایاسایی و ناشرینن."
سەرچاوە/ ڕۆیتەرز
دادگای تێهەڵچوونەوەی ئەمەریکا دەڵێت هیچ پارێزبەندییەک نیە بۆ هالکبانکی تورکیا لە دۆسییەی سزاکانی ئێراندا
