وەزارەتی دەرەوەی ئەمەریکا ڕایگەیاند پێدانی ڤیزا بە 14 بەرپرسی سوریایی قەدەغە دەکات بەهۆی بەشدارییانەوە لە پێشێلکردنی مافەکانی مرۆڤ لە سوریادا، بە بێسەروشوێنکردنی زۆرەملێشەوە.
لە مانگی سێ و دوانزەی ساڵی 2023 دا ئەمەریکا هەمان ڕێوشوێنی گرتەبەر و پێدانی ڤیزای بە 21 بەرپرسی سوریایی قەدەغە کرد.
وەزارەتی دەرەوەی ئەمەریکا دەڵێت ئەم پێشێلکارییانە لە چوارچێوەی هەوڵێکی بەرفراوانتری حکومەتەکەی بەشار ئەسەدن کە لە مێژە دەستبەسەرکردن و بێسەروشوێنکردنی زۆرەملێ بەکاردەهێنێت بۆ بێدەنگکردنی ڕەخنەگران.
وەزارەتەکە دەڵێت حکومەتی سوریا نزیکەی 100,000 کەسی بێسەروشوێن کردووە.
وتەبێژی وەزارەتی دەرەوەی ئەمەریکا ماثیو میڵەر دەڵێت " تاوەکو ئەمڕۆ زیاتر لە 96,000 پیاو و ژن و منداڵ بە شێوەیەکی زۆرەملێ بێسەروشوێن کراون لەلایەن ڕژێمی سوریاوە."
میڵەر وتی " لە ڕۆژی جیهانی قوربانیانی بێسەروشوێنکردنی زۆرەملێدا ئەمەریکا هاوسۆزی خۆی بۆ قوربانییان و ڕزگاربووانی بێسەروشوێنکراوان و خێزانەکانییان دەردەبڕێت، هەنگاویش دەگرێتەبەر بۆ لێپێچینەوە لەم پێشێلکارییە دڕندانەیە."
ئەمەریکا دەیەوێت ڕژێمەکەی ئەسەد و لایەنەکانی دیکەی سوریا کۆتایی بهێنن بە بێسەروشوێنکردن و ڕفاندن، هەروەها پێدانی ڕوونکردنەوە لەسەر دۆخی بێسەروشوێنبووەکان و ئازادکردنی ئەوانەی لە ژیاندا ماون و گەڕاندنەوەی لاشەی ئەوانەی گیانییان لە دەستداوە و هاوکاریکردن لەگەڵ دامەزراوەی سەربەخۆی بێسەروشووێنبووانی سوریادا.