ده‌یڤد کامیرۆن سه‌رۆک وه‌زیری به‌ریتانیا ڕۆژی سێشه‌ممه سه‌ردانی تورکیا ده‌کات بۆ وتووێژکردن له‌گه‌ڵ هه‌ر یه‌ک له ئه‌حمه‌د داوود ئۆغڵو ها‌وتا تورکه‌که‌ی و ڕه‌جه‌ب ته‌یب ئه‌ردۆغان سه‌رۆکی تورکیا سه‌باره‌ت به چۆنێتی ڕێگه‌گرتن له‌و به‌ریتانیانه‌ی ده‌یانه‌وێت له سنووری تورکیاوه په‌یوه‌ندی به داعشه‌وه بکه‌ن له سوریا و عێراق.
گوته‌بێژی کامیرۆن ڕۆژی دووشه‌ممه ئه‌م هه‌واڵه‌ی بۆ په‌یامنێران ڕاگه‌یاند و گوتی به‌هۆی ڕووداوه‌کانی سوریا و عێراق و ناوچه‌که، سه‌رۆک وه‌زیر له وتووێژکانیدا سه‌نگی ده‌خاته سه‌ر مه‌سه‌له‌ی نه‌هێشـتنی تێرۆر و به تایبه‌تی گروپی داعش.
کاربه‌ده‌سـتانی به‌ریتانیا ده‌ڵێن ڕووبه‌ڕووی گه‌وره‌ترین مه‌ترسی له‌سه‌ر ئاسایشی نه‌ته‌ویـیان بوونه‌ته‌وه به‌هۆی ئه‌و به‌ریتانیانه‌ی په‌یوه‌ندی به داعشه‌وه ده‌که‌ن و ده‌گه‌ڕێنه‌وه بۆ وڵات و ڕه‌نگه هێرشی تێرۆرسـتی ئه‌نجام بده‌ن.
جێی ئاماژه‌یه زۆربه‌ی ئه‌و 500 که‌سه به‌ریتانیـیه‌ی مه‌زه‌نده‌ده‌کرێت له سوریا و عێراق په‌یوه‌ندیـیان به داعشه‌وه کردبێت له ڕێگه‌ی تورکیاوه ڕۆیشـتوون. سه‌رچاوه‌کانی زانیاری له به‌ریتانیا ده‌ڵێن نزیکه‌ی نیوه‌یان گه‌ڕاونه‌ته‌وه بۆ به‌ریتانیا.