لەگەڵ ڕووداوەکاندا: کۆنفرانسی ئایندەی ڕۆژهەڵاتی کوردستان

وەک بەشێک لە چالاکییەکانی کۆنگرەی نەتەوەیی کورد "کەنەکە" چوارهەمین کۆنفرانسی ڕاوێژی ڕۆژهەڵاتی کوردستان کرا و چەند پانێڵێک لەلایەن پسپۆڕان و شارەزایانی بوارە جیاجیاکانی کوردستانی ئێران بەڕێوەبران.

کۆماری ئیسلامی ئێران بەردەوام پیلان و بەرنامەی ناجۆری هەیە بۆ فەرامۆشکردنی ناوچە کوردییەکان لە وڵاتەکەدا و وەک زۆرێک لە چاودێر هاوڕان و دەڵێن کۆماری ئیسلامی هەمیشە لە بیانویەک دەگەڕێت بۆ زەوتکردنی زیاتری مافەکانی نەتەوەکانی تر لە ئێراندا و بە تایبەتیش بۆ داماڵینی هەموو مافەکان لە کورد.

لە ڕاپۆرتی ڕێکخراوە نێونەتەوەییەکاندا، ناوی ئێران لە ڕیزبەندییەکانی سەرەوەدایە بۆ پێشێلکردنی مافەکانی مرۆڤ و سەرکوتکردن و لەسێدارە دانیش.

کورد لە ئێراندا مافی نەدراوەتێ تەنانەت بە زمانی خۆی بخوێنێت، بوژاندنەوەی ئابوری لە کوردستانی ئێراندا نییە، پەرەسەندن و پەرەپێدانی پڕۆژەکانی ئاوەدانکردنەوە لە ڕۆژئاوای ئێراندا (کوردستانی ئێران) ئەوەندە کەمن، دەچنە خانەی نەبوونەوە.

میوانی بەرنامە:

کوێستان داودی، چالاکوانی سیاسی

پسپۆڕانی سیاسی ڕای جیاوازیان هەبووە لە کۆنفرانسەکەدا لەسەر ئایندەی سیاسی و چۆنییەتی هەوڵدان بۆ جێبەجێکردنی پرەنسیپەکانی ئایندەی کورد لەو وڵاتەدا.

دۆسێکانی تایبەت بە ژنان و ژینگە و کارگوزارانیش لەم کۆنفرانسەدا بە تێروتەسەلی باسیان لەسەر کرا.

لە کۆتایی کۆنفرانسەکەشدا ژمارەیەک خاڵ جەختیان لێکراونەتەوە، لەوانە؛ شەرمەزارکردنی سیاسەتی سێدارە و سەرکوتکاری، ئاگادارکردنەوەی نێوەندە نێو نەتەوەییەکان لە ڕەوشی ڕۆژهەڵاتی کوردستان و ڕۆڵ بینینی زیاتر بۆ لێکنزیک کردنەوەی پارت و لایەنە سیاسییەکانی ڕۆژهەڵاتی کوردستان لە یەکتر.
کوێستان داودی، چالاکوان کە یەکێکە لە ڕێکخەرانی کۆنفرانسی ڕاوێژی ڕۆژهەڵاتی کوردستان، وەڵامی پرسیارەکانی ئەم هەفتەیەی بەرنامەی لەگەڵ ڕووداوەکاندا دەداتەوە.

لەگەڵ ڕووداوەکاندا: ئایندەی ڕۆژهەڵاتی کوردستان