نوێنەری باڵای نەتەوە یەکگرتووەکان جنین هێنس پلاسخارت، ڕۆژی سێشەممە داوای لە کاربەدەستانی عێڕاق کرد پاک و بێگەردی هەڵبژاردنەکانی پەرلەمانی مانگی 10 عێراق مسۆگەر بکەن.
ئەو کاربەدەستەی نەتەوە یەکگرتووەکان هۆشداری دا " سەرنەکەوتن لە ئەنجامدانی هەڵبژاردنێکی متمانەپێکراو دەشێت ببێتە هۆی لەدەستچوونێکی بەرچاو، توڕەبوونێکی بەربڵاو و بێهیوابوون. ئەمەش ڕەنگە زیاتر وڵاتەکە ناسەقامگیر بکات لەو کاتەی کە هێز و یەکڕیزی زۆر پێویستە."
جنین پلاسخارت لە میانەی کۆبونەوەی ئەنجومەنی ئاسایشدا گوتیشی " داواکاریم لە کاربەدەستانی عێڕاقی دووپات دەکەمەوە متمانەی پرۆسەی هەڵبژاردنەکان بەرزڕاگرن."
UNAMI SRSG briefing the UNSC:The elections were a central demand of the protest movement; and yet, many of its members continue to be persecuted with rampant impunity. #Iraq pic.twitter.com/XX82EtVfdM
— UNAMI (@UNIraq) May 11, 2021
ئەو گوتیشی " ئەم هەڵبژاردنانە نێوەندی داواکارییەکانی بزوتنەوەی خۆپیشاندەران بوو، لەگەڵ ئەوەشدا بەشێکی زۆری ئەندامانی هێشتا دەچەوسێندرێنەوە ".
لە ساڵی 2019 وە، هەڵمەتێکی بەربڵاوی کوشتن، ڕفاندن و هەڕەشەکردن لەو وڵاتەدا سەریهەڵداوە. نزیکەی 30 چالاکوان کوژراون و دەیانی تریش ڕفێندراون.
ئەو کاربەدەستەی نەتەوە یەکگرتووەکان دەشڵێت " فشاری سیاسی و دەستێوەردان، ترساندن، سەرچاوەی نایاسایی دارایی هەمو ئەم شتانە زیان دەگەیەنن بە متمانەی هەڵبژاردنەکان و بەشداری کردن تیایدا."
ئەو گوتیشی " کاندیدەکان، ئەوانەی هەڵمەتی هەڵبژاردن دەکەن، دەزگاکانی ڕاگەیاندن و دەنگدەرانیش دەبێت ئازادبن لە مافە دیموکراسییەکانیان لە دەمی هەڵبژاردن و پاش هەڵبژاردن و پێش هەڵبژاردنیش."