ڕووداوەکانی خەرتوم پایتەختی سودان، کاردانەوەی نێونەتەوەیی بەدوای خۆیدا هێناوە.
موسا فەکی موحەمەد، سەرۆکی کۆمیسیۆنی یەکێتی ئافریکا، هەر ئەمڕۆ دووشەممە داوای دەستبەجێ دەستپێکردنەوەی دیالۆگی کردووە لە نێوان لەشکری سودان و کاربەدەستە سیڤیلییەکاندا، پاش ئەوەی هێزە ئاسایشییەکان کەسایەتییە باڵاکانی حکومەتی قۆناغی گواستنەوەی سودانیان دەستگیرکرد.
فەکی لە ڕاگەیاندراوەکەیدا لە تۆڕی کۆمەڵایەتی تویتەر، دەڵێت " سەرۆکی کۆمیسیۆنی یەکێتی ئافریکا داوای دەستبەجێ دەستپێکردنەوەی وتووێژەکان دەکات لە نێوان لەشکر و کاربەدەستانی سیڤیلدا لە سەر بنچینەی ڕاگەیاندنی سیاسی و هەروەهاش بەندەکانی دەستور."
یەکێتی ئەوروپاش هەر ئەمڕۆ دووشەممە داوای ئازادکردنی ڕێبەرانی سیڤیلی سودانی کردووە و جەختیش دەکاتەوە لەوەی "دەبێت توندوتیژی و خوێنڕشتن دور بخرێنەوە."
نەبیلە مەسرالی، وتەبێژی کۆمیسیۆنی یەکێتی ئەوروپا بە پەیامنێرانی ڕاگەیاندووە " یەکێتی ئەوروپا زۆر نیگەرانە سەبارەت بەوەی هێزە لەشکرییەکانی سودان، عەبدوڵا حەمدۆک، سەرەک وەزیری وڵاتەکەیان دەستگیر کردوە لەگەل ئەندامانی تری حکومەتی سیڤیلدا و داواش دەکەین بە خێرایی ئازاد بکرێن."