بەرپرسی مەڵبەندی کەرکوکی یەکێتی ڕایدەگەیەنێت، دەستبەکاربوونی ڕاکان جبوری پارێزگاری کەرکوک وەکو پەرلەمانتاری عێراق یاخود دەست بەکارنەبوونی بەلای ئەوانەوە گرنگ نیە، جەخت لەسەر ئەوەدەکاتەوە دوای پێکهێنانی حکومەتی عێراق، بەفەرمی داوای پۆستی پارێزگاری کەرکوک دەکەن.
لەم گفتووگۆیەدا لەگەڵ دەنگی ئەمەریکا، ڕەوەند مەلا مەحمود بەرپرسی مەڵبەندی کەرکوکی یەکێتی دەڵێت"پۆستی پارێزگاری کەرکوک ئیستیحقاقی کوردە و کوردیش کار بۆ وەرگرتنی دەکات، گەر پەرلەمان کۆبوویەوە و حکومەت پێکهێنرا، بۆ ڕێککەوتن لەگەڵ هەر لایەنێکی سیاسی، یەکێک لە خاڵەکانمان پۆستی پارێزگاری کەرکوکە."
جەختیشیکردەوە"جگە لە کەرکوک، پۆستی پارێزگار لە هیچ پارێزگایەکی عێراق بە وەکالەت بەڕێوەنابرێت، بۆیە دەبێت ئەم کێشە چارەسەر بکرێت."
لە مانگی 10 ی ساڵی 2017 ەوە، پۆستی پارێزگاری کەرکوک لەلایەن ڕاکان جبوریەوە بە وەکالەت بەڕێوەدەبرێت، هەرچەندە ناوبراو لە دواین هەڵبژاردنی پەرلەمانی عێراقدا و لە بازنەی 3 ی کەرکوک دەنگی پێویستی بۆ بوون بە پەرلەمانتاری عێراق بەدەستهێناوە، بەڵام پێناچێت پۆستی پارێزگاری کەرکوک بەجێبهێڵێت و وەکو پەرلەمانتار سوێندی یاسایی بخوات، لەو بارەیەوە ڕەوەند مەلا مەحمود وتی"پارێزگاری کەرکوک نیەتی ڕۆیشتنی هەبێت بۆ پەرلەمانی عێراق یان نە، لای ئێمە گرنگ نیە، ئێمە پۆستی پارێزگاری کەرکوک بە ئیستیحقاقی خۆمان دەزانین و کار بۆ وەرگرتنی دەکەین."
هەرچەندە بەشێک لە بەرپرسانی پارتی خواستی خۆیان بۆ وەرگرتنی پۆستی پارێزگاری کەرکوک ناشارنەوە، بەڵام بەرپرسی مەڵبەندی کەرکوکی یەکێتی ڕەتیدەکاتەوە پارتی بەفەرمی داوای ئەو پۆستەی کردبێت، وتی"پارتی بەفەرمی داوای پۆستی پارێزگاری کەرکوکی نەکردووە، هەندێک خەڵک لەخۆیەوە لێدوانی لەسەر ئەو بابەتە داوە، ئێمە و پارتی تا ئێستا یەک تیمین بۆ دانوستان لەگەڵ بەغدا بۆ بەدەستهێنانی دەستکەوتەکانی میللەتەکەمان."
Your browser doesn’t support HTML5
ڕاپۆرتی پەیامنێر دڵشاد ئەنوەر