بەرپرسی پەیوەندییە دەرەوەییەکانی یەکێتی ئەوروپا ڕۆژی هەینی ڕایگەیاند ئێران و زلهێزانی جیهان وتووێژەکان بۆ زیندووکردنەوەی ڕێککەوتنە ناوکییەکەی ساڵی 2015 بۆ ماوەیەک ڕادەگرن بەهۆی " هۆکاری دەرەکی". ئەمەش پاش داواکارییەکانی ڕووسیا لە کۆتا ساتەکانی وتووێژەکەدا کە هەڕەشەی کردە سەر تێکدانی دانوستاندنەکان.
جۆسف بۆرێڵ بەرپرسی پەیوەندییە دەرەوەییەکانی یەکێتی ئەوروپا لە تویتێکدا ڕایگەیاند " وەستانێکی کاتیی لە وتووێژەکانی ڤییەنادا پێویست بوو لەبەر هۆکارە دەرەکییەکان، دەقی کۆتایی بە شێوەیەکی گشتی ئامادەیەو لەبەردەستە."
ڕۆژی پێنجشەممە تاران گوتی ئاستەنگی نوێ هەیە بۆ بوژاندنەوەی ڕێککەوتنەکە. واشنتن جەختیکردەوە لەسەر ئەوەی هیچ خواستێکی نییە بۆ پەسەندکردنی داواکارییەکانی ڕووسیا کە دەڵێت هیچ پەیوەندییەکی بە وتووێژەکانی ئێرانەوە نییە. گوتیشی ژمارەیەک کەمی کێشەی گەورە و قورس ماون تا بگەن بە ڕێککەوتنێک.
لایەنەکانی وتووێژەکە چاوەڕوانیان دەکرد هەتا ڕۆژی یەکشەممەی ڕابردوو ڕێککەوتنێک ئەنجام بدرایە بۆ وابەستەکردنەوەی ئێران بەو ڕێککەوتنەی کە چالاکییە ناوکییەکانی سنوورداردەکات لە بەرامبەر هەڵگرتنی سزائابورییەکان و گەڕانەوەی ئەمەریکاش بۆ ناو سەوداکە.
نزیکەی 4 ساڵ لەمەوبەر سەرۆکی ئەوکاتەی ئەمەریکا دانۆڵد ترامپ بڕیاری دا لە ڕێککەوتنەکەی ساڵی 2015 بکشێتەوە و سزاکانی سەپاندەوە بەسەر ئێراندا.
هەرچەندە ڕۆژی شەممە سەرگی لاڤرۆڤ وەزیری دەرەوەی ڕووسیا
بە شێوەیەکی چاوەڕوان نەکراو داوای گەرەنتی نوسراوی کرد کە لە ئەمەریکا کە سزاکانی سەر ڕووسیا زیان بە هاوکارییەکانی لەگەڵ ئێران نەگەیەنێت.
جۆسف بۆرێل دەشڵێت " وەکو ڕێکخەرێک، من لەگەڵ تیمەکەم، بەردەوام دەبین لە پەیوەندی بە هەموو لایەنەکانی ئەو ڕێککەوتنەو واشنتندا بۆ ئەوەی بتوانین زاڵبین بەسەر بارودۆخەکەی ئێستاو ڕێککەوتنەکە تەواوبکەین."