جێگری سەرۆکی فراکسیۆنی یەکێتی: لە 16 ی ئۆکتۆبەریش گوتمان عێراق ناتوانێت هێز بەکاربهێنێت، کەچی بەکاریشی هێنا

جێگری سەرۆکی فراکسیۆنی یەکێتی نیشتیمانی کوردستان لە پەرلەمانی عێراق ڕایدەگەیەنێت، ئەو بڕیارانەی دادگای فیدراڵی عێراق بەرامبەر نەوت و گازی هەرێم دەریکردوون، گەر هەرێم هەوڵنەدات بە گفتووگۆ لەگەڵ بەغدا چارەسەریان بکات، ئەوا گرفتی گەورەیان بۆ هەرێم بە دواوەیە.

لەم گفتووگۆیەدا لەگەڵ دەنگی ئەمەریکا، کەریم شکور جێگری سەرۆکی فراکسیۆنی یەکێتی لە پەرلەمانی عێراق، لە بارەی ئەگەری دەست لە کارکێشانەوەی بە کۆمەڵی پەرلەمانتارانی ڕەوتی سەدر لە پەرلەمانی عێراق، دەڵێت"مەسەلەکە بە کارتی فشاردەبینم، چونکە هەڵوەشاندنەوەی پەرلەمانی عێراق پێویستی بە پێشنیاری سەرۆک وەزیران و ڕەزامەندی سەرۆک کۆمار و دەنگدانی 50 کۆ یەکی پەرلەمانتارانە، یاخود پێویستی بە پێشنیاری یەک لەسەر سێی پەرلەمانتاران و دەنگدانی 50 کۆ یەکی پەرلەمانتارانە، ئەمە میکانیزمی هەڵوەشاندنەوەی پەرلەمانە بەپێی دەستور."

جێگری سەرۆکی فراکسیۆنی یەکێتی لە پەرلەمانی عێراق پێیوایە، ئامادەکردنی نامەی دەست لە کارکێشانەوەی پەرلەمانتارانی ڕەوتی سەدر لە پەرلەمان، گەڕێکی تری فشارە بۆ سەر لایەنە نەیارەکانیان، گوتی"تا ئێستا دەست لە کارکێشانەوەکانیان نەداوەتە پەرلەمان، تەنها ئامادەیان کردووە، ئەوان گەورەترین کوتلەن و دەتوانن ڕێگەی تریش بگرنەبەر، بەڵام تا ئێستا ڕەنگە فشاربێت."

بەپێی بەدواداچوونەکانی دەنگی ئەمەریکا، هەوڵی ژێر بە ژێر لە ئارادایە بۆ وروژاندنی دۆسیەی یاسایی دژی محەمەد حەلبوسی و دوورخستنەوەی لە سەرۆکایەتی پەرلەمان، لەوبارەیەوە کەریم شکور گوتی"زانیاریم نیە، بەڵام بەپێی پەیڕەوی ناوخۆی پەرلەمان، دوورخستنەوەی ناوبراو، دەنگی نیوە زائید یەکی دەوێت، بەڵام ئەمەم نەبیستووە."

جێگری سەرۆکی فراکسیۆنی یەکێتی لە پەرلەمانی عێراق، هۆکاری چەقبەستوویی دۆخی سیاسی عێراقی بۆ ئەوە گێڕایەوە، لایەنەکان لە سەقفی داواکاریەکانیان دانابەزن، گوتی"وایدەبینم، یاسای ئاسایشی خۆراک کە لە پەرلەمان دەنگی لەسەر درا، گەر تانەی لێنەدرێ و بە نادەستوری حساب نەکرێ، بەردەوامی بە حکومەتەکەی کازمی بدات."

دوای بڕیارەکەی دادگای فیدراڵی عێراق دژی نەوت و گازی هەرێم، یەکێک لەو مەترسیانەی لای چاودێران دروستبووە، بە کارهێنانی هێزە لەلایەن عێراقەوە بۆ کۆنترۆڵکردنی هەندێک کێڵگەی نەوتی ژێر کۆنترۆڵی هەرێم، لەوبارەیەوە کەریم شکور گوتی"دەبێت کێشەکانی نێوان هەرێم و بەغدا بە گفتووگۆ چارەسەر بکرێن، بڕیارەکانی دادگای فیدراڵی گەر بە مەبەستیش بدرێن، بڕیاری کۆتایین، بۆیە بڕیارەکان بە مەترسی دەزانم و دەبێت بە گفتووگۆ کێشەکان چارەسەر بکەین، ئێمە هەرێمێکین لە چوارچێوەی عێراقی فیدراڵدا، خۆمان دەستور و دادگای دەستوریمان نیە، لەوانەیە ڕەخنە لە هەندێک لە یاساکانیشمان بگێرێت بەوەی لەگەڵ یاساکانی عێراق دا یەکناگرێتەوە، بۆیە گفتووگۆ باشترین چارەسەرە و هەوڵبدەین بە توندی مامەڵە نەکەین."

گوتیشی"گەر عێراق هێزیش بە کارنەهێنێت، سبەینێ، ئەو بڕیارانەی دادگا، هەرێم تا چەندین ساڵی تر دەکەن بە ژێر قەرزەوە، سەبارەت بە بەکارهێنانی هێزیش، ئێمە لە 16 ی ئۆکتۆبەر پێمانوابوو، عێراق ناتوانێت هێز بەکاربهێنێت، هێزیشی بەکارهێنا و کەسیش هیچی نەوت، عێراق دەوڵەتە و ئێمە بەشێکین لەو دەوڵەتە، دەبێت بەپێی دەستور کێشەکانمان چارەسەر بکەین."

لە کۆتایی گفتووگۆکەیدا لەگەڵ دەنگی ئەمەریکا، کەریم شکور جێگری سەرۆکی فراکسیۆنی یەکێتی لە پەرلەمانی عێراق، بڕینی ئەو 200 ملیار دینارەی مانگانە لە عێراقەوە بۆ هەرێم دەنێردرێت بەپێشبینیکراو ناوبرد، گوتی"ڕەنگە میکانیزمی تریش دژی هەرێم بەکاربهێنن، ئەوەتا وەزیری نەوت لێدوانی توند دەدات، خەڵکی تریان لە نێو پەرلەماندا شت دەوروژێنن، بۆیە دەبێت کێشەکانمان بە گفتووگۆ و بەپێی دەستور چارەسەر بکەین."

دەقی ڕاپۆرتی دڵشاد ئەنوەر