شەوی دووشەممە بەکاتی هەرێمی کوردستان چوار مووشەک ئاڕاستەی دەوروبەری گوندی تاراوەی ناحیەی خەلیفانی سنووری ئیدارەی سەربەخۆی سۆران کران. ئەمە بەپێی کاربەدەستێکی ناوچەکە و ئاماژە بۆ ئەوە دەکەن کە ئەو مووشەکانە زیانی گیانی و مادیان لێ نەکەوتووەتەوە.
هەڵگورد شێخ نەجیب سەرپەرشتیاری ئیدارەی سەربەخۆی سۆران بە دەنگی ئەمەریکای ڕاگەیاند"چوار مووشەک ئاڕاستەی دەوروبەری گوندی تاراوەی ناحیەی خەلیفان کراون و تا ئێستاش بەپێی زانیارییەکان هیچ زیانی گیانی و مادی نەبووە".
وتیشی " یەکەم جارە ئـەو مووشەکانە ئاڕاستەی ئەو شوێنە دەکرێن پێشتر نەکراون."
سەبارەت بەوەی کە ئـەو مووشەکانە لە کوێوە ئاڕاستە کراون و بۆچی ئاڕاستە کراون ؟
هەلگورد شێخ نەجیب دەڵێت "مووشەکەکان لەکوێوە ئاڕاستە کراون و ئامانجیان چیە؟ ئەمەیان تا ئێستا بە دیارنەکەوتووە و بەدەستمان نەگەیشتووە و هێزە ئەمنیەکان گەیشتوونەتە شوێنی ڕووداوەکە و خەریکی لێکۆلینەوەن".
ئایا هیچ هێزێکی چەکدار لەو شوێنەی کە مووشەکی ئـاڕاستە کراوە بوونیان هەیە، وەکو پەکەکە و هێزە کوردییەکانی تر؟
سەرپەرشتیاری ئیدارەی سەربەخۆی سۆران گووتی " هەن بەڵام بە دیاریکراوی لەو شوێنەی کە مووشەکی ئاڕاستە کراوە نین، لەو نزیکانە نین بۆیە خەریکی لێکولینەوەین."
لە لایەکی ترەوە سەبارەت بە فرۆکەخانەی هەریر و سنووری ناحیەی هەریر، کاروان کەریم خان بەڕێوەبەری ناحیەی هەریر بە دەنگی ئەمەریکای ڕاگەیاند" لە فڕۆکەخانەی هەریر و سنووری ناحیەی هەریر هیچ حاڵەتێکی هێرشکردن و نائاسایی ئەمنی ڕووینەداوە".
بەپێی میدیاکانی هەرێمی کوردستان بە فرۆکەی بێفرۆکەوان هێرشکراوەتە سەر ئۆتۆمبێلێکـ بەڵام هێشتا پشتراست نەکراوەتەوە.
هاوکات دژه تیرۆری کوردستان لە فەیسبوکەکەی خۆی دەڵێت " فڕۆکەی بێفڕۆکەوان مەفرەزەیەکی چەکدارانی پەکەکە لە دۆڵی بالیسان دەکاتە ئامانج.
بە گوێرەی زانیارییەکانی دژەتیرۆری کوردستان، کاتژمێر 20:10ی ئێوارەی ئەمڕۆ دووشەممە 5ی ئەیلوولی 2022، فڕۆکەیەکی بێفڕۆکەوانی نەناسراو مەفرەزەیەکی چەکدارانی پەکەکەی لە دۆڵی بالیسان کردە ئامانج.
بە گوێرەی زانیارییەکان، مەفرەزە چەکدارەکەی پەکەکە لە سنووری ئیدارەی ڕاپەڕینەوە دەرباز بوون و لە دۆڵی بالیسان لە رێگەی فڕۆکەی بێفڕۆکەوانەوە کراونەتە ئامانج، دەزگا ئەمنییەکان لێکۆڵینەوەکانیان لەو بارەوە دەست پێ کردووە."
Your browser doesn’t support HTML5
ڕاپۆرتی ئەحمەد زێباری