حكومەت و بەڕێوەبەرایەتیەکانی بەرەنگاربوونەوەی توندوتیژی لەسەر زیادبوونی حاڵەتەکانی توندوتیژی دژ بە ژنان کۆدەبنەوە

لە بەرامبەر زیادبوونی حاڵەتەکانی کوشتنی ژنان و دەستێوەردان لە کەیسەکاندا لە کاتی دادگایکردنی بکوژاندا، کەمپێنێک دژی کوشتنی ژنان ڕاگەیەنراوە و لەسەر ئاستی حکومەتی هەرێمی کوردستان جێگری سەرۆکی حکومەت پشتیوانی لێدەکات، بڕیارە هەفتەی ئایندەش حکومەت و سەرجەم بەڕێوەبەرایەتیەکانی بەرەنگاربوونەوەی توندوتیژی خێزانی کۆببنەوە بە مەبەستی زانینی هۆکارەکانی زیاد بوونی توندوتیژی خێزانی .

ماوەی چەند ڕۆژێکە لە پارێزگاکانی سلێمانی و هەڵەبجە بە پشتیوانی قوباد تاڵەبانی جێگری سەرۆکی حکومەتی هەرێمی کوردستان کەمپێنیک بۆ بەرەنگاربوونەوەی کوشتنی ژنان ڕاگەیەنراوە و ڕێکخراوەکانی ژنان و چالاکوان و بەڕێوەبەرایەتیەکانی توندوتیژی دژ بە خێزانیش بەشێوەی جیاجیا و لە پارێزگاکان پشتیوانی خۆیان بە کۆکردنەوەی واژۆ دژی ژن کوژان دەستپێکرد و ئاماژە بەوەدەکەن دەبێت کۆتایی بە کوشتنی ژنان بهێنرێت.

لە پارێزگای هەڵەبجە و لە بەردەم پەیکەری عادیلە خانم بەشێک لە ژنانی ڕێکخراوەکان و ژنانی خاوەن پێگە لە ئیدارەی هەڵەبجە بەیاننامەیەکیان لە بەردەم کەناڵەکانی ڕاگەیاندن لەلایەن کۆێستان ئەکرەم سەرۆکی شارەوانی هەڵەبجەوە خوێندەوە و ڕایگەیاند "پشتیوانی لەو هەڵمەتە دەکەین و واژۆ دژ بە ژن کوشتن کۆدەکەینەوە".

مقەدەمی مافپەروەر بورهان ئەحمەد بەڕێوەبەری بەرەنگاربوونەوەی توندوتیژی دژ بە ئافرەتان و خێزان لە پارێزگای هەڵەبجە لە لێدوانێکدا بە دەنگی ئەمەریکای ڕایگەیاند" ئامارەکانی توندوتیژ دژ بە ژنان ڕوویان لە زیاندبوونە و هەفتەی ئایندەش لەگەڵ جێگری سەرۆکی حکومەت سەرجەم بەڕێوەبەرایەتیەکان کۆدەبنەوە تا میکانیزمی وردتر وەک حکومەت بۆ ڕوبەروبوونەوەی کوشتنی ژنان دابنێین."

ئەگەرچی بەڕێوبەرایەتی بەرەنگاربوونەوەی توندوتیژی دژ بە ئافرەتان و خێزان لەسەرجەم پارێزگاکان کراوەتەوە و هێڵی گەرمی پەیوەندی دانراوە بەڵام بە وتەی ئەوان ئامارەکان ڕوویان لە هەڵکشان کردووە، هەندێکجاریش وەک ژنان دەڵێن بکوژەکان بە ڕێکەوتنی کۆمەڵایەتی ئازاد دەکرێن و پەردەپۆشی تاوانەکەیان دەکرێت، بڕیارە تا ڕۆژی سێشەممە لە هەڵەبجە واژۆ کۆبکرێتەوە و واژۆکانیش دواتر بگەیەنرێنە جێگری سەرۆکی حکومەت.

دەقی ڕاپۆرتی فەرحان هەورامانی