گروپی هاوپەیمانی ژنان بۆ ڕوبەڕوبوونەوەی توندوتیژی پەیڕەوی ناوخۆی هاوپەیمانیەکەیان پەسەند دەکەن

لە ماوەی دوو ڕۆژدا گروپی هاوپەیمانی ژنان لە مۆنۆمێنتی هەڵەبجە پەیڕەوی ناوخۆی هاوپەیمانیەتیەکەیان بۆ ڕوبەڕوبوونەوەی توندوتیژی خێزانی پەسەند دەکەن، کە پێکهاتوون لە نوێنەرانی دامەزراوە حکومییەکان و ڕێکخراوەکانی ژنان و ئافرەتان، دەیانەوێت پێکەوە بەبێ بیرکردنەوەی حزبی لە پێناو ژن بوون هەنگاوە کردارییەکانیان بۆ ڕوبەروبوونەوەی توندوتیژی خێزانی بنێن و هەڵوێستی ڕەسمی خۆیان لە هەمبەر کوشتنی ژنان لە هەرێمی کوردستان و دەرەوەش ڕابگەیەنن.

گرووپی هاوپەیمانی ژنانی کوردستان پێکهاتووە لە ژمارەیەک لە ژنانی چالاکوان و ئەندام لە ڕێکخراوەکانی ژنان و ئافرەتان لە سەرجەم پارێزگاکانی هەرێمی کوردستان و بەڕێوەبەرایەتیەکانی توندوتیژی خێزانی کۆبوونەوەی وەرزی خۆیان بۆ پەسەندکردنی پەیڕ‌ەوی هاوپەیمانیەتیەکەیان هێنایە هەڵەبجە و بڕیارە لە ماوەی دوو ڕۆژدا پەیڕەوی هاوپەیمانیەتیەکە پەسەند بکەن. ئامانج لە پێکهێنانی هاوپەیمانیەتیەکەیان بەرگریکردنە لە ژنان و ڕێگریکردنە لە توندوتیژی خێزانی.

کوێستان ئەکرەم سەرۆکی شارەوانی هەڵەبجە و ئەندامی هاوپەیمانیەتیەکە لە لێدوانێکدا بە دەنگی ئەمەریکای ڕاگەیاند" هاوپەیمانیەتیەکە ئامانجی بەرگریکردنە لە ژنان و ڕێگری کردنە لە کوشتنی ژنانە و دوورە لە هەموو ئایدیا و باکگراوندێکی سیاسی و لایەنە حکومی و ڕێکخراوە حزبی و سەربەخۆکانی ژنان کە بەشدارن لە هاوپەیمانیەتیەکە و دەمانەوێت بەرگری لە ژن بوون بکەین، ئەندامانی هاوپەیمانیەتیەکە لە زیاتر لە 100 ئەندام پێک دێت".

فێنک شەفیق بەڕێوبەری گشتی لە بەڕێوبەرایەتی توندوتیژی خێزانی و ئافرەتان لە لێدوانێکدا بە دەنگی ئەمەریکای ڕاگەیاند" لە ساڵی 2020 وە دەمانەوێت کار لەسەر ژنان بکەین و بە یەک دەنگ و یەک ڕەنگ ڕووبەرووی ژن کوشتن ببینەوە و ژنان بەرەو قۆناغی سەرکردەیی بەرین، ئێمە دەمانەوێت بزانین چی بکەین بۆ ئەوەی توندویژی کەم بکەینەوە و پشتیوانی هەنگاوەکانی یەکتری بین."

تریفە فەرەیدوون ئەندامی هاوپەیمانیەتیەکە لە لێدوانێکدا بە دەنگی ئەمەریکای ڕاگەیاند " ئەوانە کۆبوونەوەکانیان دەبەنە ناو سەرجەم پارێزگاکان، ئەمەش پێنجەمین کۆبوونەوەیانە کە پەیڕەوی ناوخۆیان لە هەلەبجە پەسەند دەکەن و بۆ گیانی ئەو قوربانیانەی کە 65% قوربانیەکانی کیمیاباران ژن و منداڵان بوون، بۆیە ئەمڕۆ هاتوونەتە هەڵەبجە و دەیانەوێت ئەو کەسایەتیانەش ببینن کە ئەندام نین لە هاوپەیمانیەتیەکە تا بتوانن پەیڕەوەکەیان دەوڵەمەند تربکەن."

هاوپەیمانیەتیەکە پرسی دەربڕینی هەڵوێستی کرداری بەرامبەر بە کوشتنی ژنان لە ناوخۆی هەرێمی کوردستان و دەربڕینی هەوڵوێستی هاوبەشی هاوپەیمانیەتیەکە لەبەرامبەر کوشتنی ژنان لە سەر ئاستی دەرەوەی هەرێم و پشتیوانیکردن لە شۆڕشی ژنان لە ئێران تاوتوێ دەکات و لە ماوەی دوو ڕۆژدا هەڵوێستی ڕەسمی خۆیان ڕادەگەیەنن.

دەقی ڕاپۆرتی فەرحان هەورامانی