تورکیا لە هێرشەکانیدا بۆ سەر باکور و ڕۆژهەڵاتی سوریا کێڵگە نەوتی و گازییەکانی هەرێمەکەی کردووەتە ئامانج.
فڕۆکە جەنگییەکانی سوپای تورکیا ٤ جار وێستگەی غاز و نەوتیان لە گوندی عەلی ئاغای سەربە ناوچەی تل کۆچەر کردووەتە ئامانج.
جگە لەوەش فڕۆکە جەنگییەکانی تورکیا ڕۆژی چوارشەممە وێستگەی نەوتی شەللومییەیان لە گوندەکانی ڕۆژهەڵاتی قامیشلۆ بۆردومان کردووە و لە ئەنجامدا ئاگرێکی گەورە کەوتەوە.
زانا عومەر، پەیامنێری دەنگی ئەمەریکا لە قامشلۆ دەڵێت، فڕۆکە بێفڕۆکەوانەکانی تورکیا دووجار بیرێکی نەوتیان لە نزیک گوندی ئلئۆدا لە نزیک شارۆچکەی تێرپێسپی بۆردومان کرد.
سەرچاوەیەکی تایبەت ڕایگەیاندووە کە دوکەڵ هێشتا لە نزیک کێڵگە نەوتییەکان بەرز دەبێتەوە.
هەروەها لە گوندەکانی دێرک بنکەیەکی کە سەرچاوەی سەرەکی گاز و کارەبای ناوچەی جەزیرێیە بۆردومان کرا.
لەهەمانکاتدا وێستگەی دابەشکردنی کارەبای قارەچۆخ لە گوندی دێرک بەهۆی تۆپبارانی فڕۆکەکانی تورکیاوە لە کارکەوتووە.
بە گوێرەی شارەزایان، سەرچاوەکانی گاز و نەوت و کارەبا لە هەرێمی جەزیرەی سوریا 80%ی پێداویستییەکانی 5 ملیۆن هاووڵاتییە.
کاربەدەستانی بەڕێوەبەرایەتی خۆسەر دەڵێن تورکیا هەوڵەکانی بەڕێوەبەرایەتییەکە و هاوپەیمانی نێودەوڵەتی شەڕی داعش لە بۆ سەقامگیرکردنی ئارامی و ئاسایشی ناوچەکە، بە هێرشەکانی بۆ سەر سەرچاوەکان تێکدەدات.