ئاستی ئاوی ڕووباری فورات کە سەرچاوەیەکی سەرەکی ئاوە لە سوریا و عێراق، هەر لە باکوری سوریاوە بەشێوەیەکی بەرچاو کەمیکردووە، بەهۆی ئەوەی تورکیا بە دروستکردنی بەنداو ڕێژەی دەرچوونی ئاوەکەی لە تورکیاوە کەمکردووەتەوە.
ماوەی سێ ساڵە ئاوی ئەم ڕووبارە بەرەو کەمبوونەوە دەڕوات و ئێستا گەیشتووەتە ئاستێکی مەترسیدار.
بە گوێرەی بەڕێوەبەری کاروباری بەنداوەکان لە بەڕێوەبەرایەتی خۆسەر، خەریکە کاری بەنداوەکان لە سەر ڕووبار یان بەنداوی تشرین لە مەنبج و بەنداوی فورات لە تەبقە ڕابوەستێت، چونکە ئاوی ناو دەریاچەکانی پشتی بەنداوەکان گەیشتووەتە ئاستێکی وشکبوون.
لاوازبوونی ڕووباری فورات کاریگەری نەرێنی هەیە لەسەر زۆرێک لە بەشەکانی ژیان لە باکور و ڕۆژهەڵاتی سوریا، وەک لەکارکەوتنی کشتوکاڵ و ئاودێری لە سەرتاسەری ناوچەکانی کەناری ڕووبارەکان، بڕینی کارەبا، گرفتەکانی تەندروستی و بڵاوبوونەوەی نەخۆشییەکانی وەکو کولێرا بەهۆی پیسبوونی ئاوەوە.
رووباری فورات کە سەرچاوەکەی لە چیاکانی تۆرۆسی تورکیاوەیە و بە نێو سوریادا تێدەپەڕێت تا دەگاتە عێراق و پاشان لە پارێزگای بەسرەی باشوری عێراق لەگەڵ ڕووباری دیجلە لە ڕووباری عەربدا یەکدەگرن تا دەچێتە نێو کەنداوەی فارسەوە.
تورکیا 19 بەنداوی لەسەر ڕووباری فورات و دیجلە دروستکردووە و پلانی هەیە بە گشتی 22 بەنداو دروست بکات، ئەوان بەشێکن لە پرۆژەی باشووری ڕۆژهەڵاتی ئەنادۆڵ.
ئامانجی پڕۆژەکە پەرەپێدانی باشووری ڕۆژهەڵات و زیادکردنی کشتوکاڵ و بەرهەمهێنانی کارەبایە. چونکە سەرچاوەی ئاوەکە لە تورکیایە، ئەو وڵاتە خۆی بە خاوەنی ئاوەکە دەزانێت، دەڵێت پێداویستییەکان لەبەرچاو دەگرێت و بڕیار دەدات کە چەندە ڕێگە بدات بەرەو خوارەوە بڕوات. بەڵام عێراق خاوەندارێتی بە هاوبەش دەزانێت و دەیەوێت ڕێککەوتنێکی هەمیشەیی بە سنوورێکی دیاریکراوەوە هەبێت و ئەم بابەتەش لەمێژە جێگای مشتومڕی سیاسی بووە لە نێوان وڵاتەکاندا.
لەم وێنانەی پەیامنێری دەنگی ئەمەریکادا دەردەکەوێت کە ئاوی ڕووبارەکە لە باکوری سوریاوە چەندێک کەمی کردووە.
ڕووباری فورات لە باکوری سوریا
ڕووباری فورات لە باکوری سوریا
ڕووباری فورات لە باکوری سوریا
ڕووباری فورات لە باکوری سوریا
ڕووباری فورات لە باکوری سوریا