لە 43هەمین ساڵیادی تاوانی ڕژێمی بەعس دژ بە کوردە فەیلییەکان، کۆنسوڵخانەی ئەمەریکا لە هەولێر باس لەو تاوانانە دەکات کە دژ بە کوردە فەیلییەکان لە عێراقدا کراوە.
کۆنسوڵخانەکە لە پەیامێکیدا دەڵێت " حکومەتی ویلایەتە یەکگرتووەکانی ئەمەریکا پابەندە بە برەودان بە مافەکانی مرۆڤ بۆ هەموان."
لەم یادەدا سەرۆکی هەرێمی کوردستان نێچیرڤان بارزانیش بەیاننامەیەکی بڵاو کردەوە و تیایدا دەڵێت "ئەوه‌ى دەرهەق بە کوردانی فەیلی کرا، پاکتاوێکی نەژادیی ڕەگەزپەرستانە بوو. تيایدا وێڕای بێسەروشوێنکردنی دەیان هەزار هاووڵاتیی بێتاوان، سەتان هەزاریشیان دووچاری ڕاگواستن و وڵاتبەدەرکردن و زەوتکردنی ماڵ و موڵکیان و لێسەندنەوەی ڕەگەزنامە بوونه‌وه تەنها لەبەر کوردبوون و داکۆکیکردنیان لە ناسنامە و مافە ڕەواکانی میللەتەکەیان."
هەروەها ئاماژەی بەوەش کردووە " ناساندنی ئەو تاوانە بە جینۆساید لەلایەن دادگای باڵای تاوانەکانی عێراقەوە، حکومەت و دەوڵەتی عێراق ڕووبەڕووی ئەرک و بەرپرسیاریەتیی یاسایی و مرۆیی دەکاتەوە بۆ قەرەبۆکردنەوەی قوربانييان."
لە سەردەمی ڕژێمی پێشووی بەعسدا، لە ساڵانی 1970کان کوردانی فەیلی ڕووبەڕووی پەراوێزخستنی سیستماتیک لەلایەن دەوڵەتەوە بوونەوە و کرانە ئامانج. ئاژانسی یەکێتی ئەوروپا بۆ پەناخوازان دەڵێت کوردانی فەیلی بە تۆمەتی سیخوڕیکردن بۆ ئێران ،مافی هاووڵاتیبوونیان لێسەندرایەوە و 300 هەزار کەسیان دەرکران بۆ ئێران.
لە پاش ساڵی 2003 و ڕووخانی ڕژێمی بەعس بەشێکی زۆری کوردە فەیلیەکان گەڕانەوە بۆعێراق.
لەگەڵ ئەوەی لە ساڵی 2019 وەزارەتی ناوخۆی عێراق هەوڵی گەڕاندنەوەی مافی نەتەوەیی و پێگەی یاسایی کوردی فەیلی دەدا، بەڵام هێشتا زۆرێک لە کوردانی فەیلی بێ هاووڵاتینامەن.
هەرچەندە ئامارێکی تەواو لەبەردەستدا نییە بەڵام بە پێی پێگەی مافی کەمینە نەتەوەکانی جیهان نزیکەی 1 ملیۆن و نیو کوردی فەیلی لە عێراقدا هەن کە زۆربەیان لە بەغدا نیشتەجێن.