نیاز عەبدوڵا: گروپی مافیایی خۆیان خزاندووەتە نێو خۆپیشاندانەکانی فەرەنساوە

خۆپیشاندانەکان لە فەرەنسا بۆ ناڕەزایەتی دەربڕین بەرامبەر بە کوشتنی گەنجێکی بە ڕەچەڵەک جەزائیری لەلایەن پۆلیسەوە، بەردەوامە. حکومەتی فەرەنسا 45,000 پۆلیس و چەند ئوتومبێلێکی زرێپۆشی ڕەوانەی شەقامەکانی شارەکانی وڵاتەکە کردووە بۆ دامرکاندنەوەی پشێوییەکان لە کاتێکدا گازی فرمێسکڕێژیشی بەکارهێناوە.

رۆژنامەوان نیاز عەبدوڵا، دانیشتوی پاریس دەڵێت ئەم ناڕەزایەتییانەی ئێستا شتێکی نوێ نین بەڵکو پێشینەیەکی کۆنی هەیە "ناڕەزایەتییەکانی ئێستای فەڕانسا دەرئەنجامی پێشینەیەکی ناڕەزایەتی گەورەیە کە لە فەڕەنسا ساڵانێکە هەیە بەهۆی بەکارهێنانی توندتیژی پۆلیسەوە."

بە پێی ئامارێکی ساڵی 2022، بەهۆی توندوتیژی پۆلیسەوە 13 کەس لە فەرەنسا کوژراون ئەمەش نیگەرانی لەلایەن چالاکوانان دروست کردووە .

نیاز عەبدوڵا خاوەنی خەڵاتی CPJ ( کۆمیتەی پاراستی ڕۆژنامەنوسان) دەڵێت " پۆلیسی بەرەنگاربوونەوەی نائارامی، چەکیان پێیە و ڕێگەیان پێدراوە بە پێی یاسا ئەم چەکانە بەکاربهێنن بە تایبەت لە بارودۆخێکدا کە هەستیان کرد ڕووبەڕووی مەترسی دەبنەوە، یان ئاژاوەگێڕی هەیە. ئەمەش وا دەکات کە پۆلیس بتوانێت هێزی قورس بەکاربهێنێت."

پاش کوشتنی لاوێک بە ناوی نائیل م. لە شارۆچکەیەکی سەر بە پاریس خۆپیشاندان سەرانسەری وڵاتەکەی گرتەوە و خۆپیشاندەران داوای " دادپەوەری بۆ نائیل" دەکەن.

ئەو خۆپیشاندانانە ڕەشی فەرەنسای ئاڵۆز کردووە تا ئەندازەیەک کە سەرۆکی فەڕەنسا ئیمانوێل ماکرۆن سەردانەکەی بۆ ئەڵمانیا دواخست کە بڕیار بوو ڕۆژی یەکشەممە دەستپێبکات.

نیاز عەبدوڵا دەڵێت "خۆپیشاندانەکانی فەڕەنسا زۆر زۆر گەورەن." هاوکات دەشڵێت "بەشێکی لە ناوەندە بازرگانییەکانی فەڕەنسا بەتەواوەتی خەریکە ڕووبەڕووی مەترسی دەبنەوە، ئەمەش زیانێکی گەورەی بە ئابوری فەڕەنسا گەیاندووە."

دەشڵێت "گروپی مافیایی خۆیان خزانۆتە ناو ئەم خۆپیشاندانانەی فەڕەنساوە، حکومەتی فەڕەنسا ماوەیەکی زۆر گیرۆدەی دەستی ئەم مافیایانە بووە."

دەقی وتووێژەکەی نیاز عەبدوڵا لەگەڵ دەنگی ئەمەریکا:

نیاز عەبدولا