لەم دواییانە تورکیا هێرشی فڕۆکە بێ فڕۆکەوانەکانی لە سوریا بۆ سەر هێزەکانی سوریای دیموکرات و بەڕێوەبەرایەتی خۆسەر زیادکردووە. تورکیا دەڵێت ئەندامان و کەسانی نزیک لە پارتی کرێکارانی کوردستان دەکاتە ئامانج .
دوایین هێرشی ئەو فڕۆکانە، ڕۆژی پێنجشەممە بوو کاتێک ئۆتۆمبیلێکیان لە ڕۆژئاوای شاری قامیشلۆ کردە ئامانج و لە ئاکامدا 4 کەس گیانیان لەدەست دا و 2 کەسی دیکە برینداربوون.
هێزەکانی سوریای دیموکرات ڕاگەیاندنێکیان بڵاوکردەوە و تیایدا دەڵێن هێزەکانیان کراونەتە ئامانج کە یەکێکیان فەرماندەیەک بووە بە ناوی ئارام محەمەد ئیبراهیم و لە شەڕی دژی داعش بریندارببوو و بەشێکی جەستەی لەدەست دابوو، شەڕڤانەکانی دیکەش ڕۆڵێکی چالاکیان هەبووە لە هەموو شەڕەکانی دژی داعش.
ساڵح موسلم، هاوسەرۆکی پارتی یەکێتی دیموکراتی بە دەنگی ئەمەریکا وت، لە پاش ئەو کۆبوونەوانەی نێوان ڕووسیا و ئێران و تورکیا و سوریا ئەنجامدران، هێرشەکان زیادیانکردووە. دەڵێت ئەم وڵاتانە دوو ئامانجیان هەیە، یەکەم لەناوبردنی بەڕێوەبەرایەتی خۆسەر و دووەم دەرکردنی هێزەکانی هاوپەیمانان بە ڕابەرایەتی ئەمەریکا لە سوریا.
زانا عومەر پەیامنێری دەنگی ئەمەریکا لە قامیشلۆ ڕاپۆرتێکی دەنگی لەم بارەیەوە ناردووە.
Your browser doesn’t support HTML5
ڕاپۆرتی زانا عومەر سەبارەت بە زیادبوونی هێرشی فڕۆکە بێ فڕۆکەوانەکانی تورکیا