دوو دەزگای ڕاگەیاندنی سەر بە سوپای پاسدارانی ئێران دەڵێن وڵاتەکەیان دوو بارەگای گروپی "جیش‌العدل" ی لە ناو خاکی پاکستان بۆردومانکردووە و وێرانیکردوون.
هەردوو ئاژانسی تەسنیم و فارس نیوز شەوی سێشەممە بە کاتی خۆجێی ڕایانگەیاند بە موشەک و فڕۆکەی بێ فڕۆکەوان لە هەردوو بارەگاکە دراون کە دەکەونە ناوچەی کوهی سەبز لە ناوچەی بەلۆچستان لە باشوری ڕۆژئاوای پاکستان.
پاکستان بە توندی سەرکۆنەی هێرشەکەی کرد و لە ڕاگەیاندنێکدا کە لەلایەن وەزارەتی دەرەوەی بڵاوکرایەوە، دەڵێت ئەمە پێشێلکردنێکی بێ پاساوی ئاسمانی وڵاتەکەیەتی و بەهیچ شێوەیەک جێی قبوڵ نییە. ئاماژە بۆ ئەوەش دەکات 2 منداڵ کوژراون و 3 کچیش برینداربوون. هەروەها وەزارەتەکە لە ڕاگەیاندنەکەی دەشڵێت ئەمە بۆی هەیە ئاکامی خراپی لێبکەوێتەوە.
🔊: PR NO. 1️⃣5️⃣/2️⃣0️⃣2️⃣4️⃣Pakistan’s Strong Condemnation of the Unprovoked Violation of its Air Space🔗⬇️https://t.co/TAWRqC7qMy pic.twitter.com/oqi3tvAOso
— Spokesperson 🇵🇰 MoFA (@ForeignOfficePk) January 16, 2024
جەیشوئەلعەدل، گروپێکی سوونەیە و لە ساڵی 2012 وە دامەزراوە، دەڵێن شەڕی هێزەکانی ئێران دەکەن بۆ گەڕاندنەوەی مافی سوونەکان لە وڵاتەکەدا. ئێرانیش بە گروپێکی تێرۆرستی ناودێری دەکات، دەڵێت ئەم گروپە ئامانجی ئاینزایی هەیە.