جۆو بایدن، سەرۆکی ئەمەریکا ڕۆژی یەکشەممە کشانەوەی خۆی لە کاندیدبوونی پارتی دیموکرات بۆ هەڵبژاردنی سەرۆکایەتی ئەمەریکا ڕاگەیاند.
46ـهەمین سەرۆکی ویلایەتە یەکگرتووەکانی ئەمەریکا کە پلانی هەبوو بۆ خولێکی دیکە لە پۆستەکەیدا بمێنێتەوە و خۆی بە شایستەترین کەس دەزانی بۆ شکستپێهێنانی دانۆڵد ترامپی کاندیدی کۆمارییەکان، لەم دواییانەدا ڕووبەڕووی ڕەخنەی پارتەکەی خۆی ببووە بە هۆی باری تەندروستییەوە.
دوای یەکەم دیبەیتەکەی نێوان بایدن و ترامپ، ڕەخنەکان لە جۆو بایدنی تەمەن 81 ساڵ زیاتر بوو، بەشێک لە دیموکراتەکان داوای وازهێنان لە کێبڕکێی سەرۆککۆماریان کرد بەهۆی "ئەدای خراپی لە مشتومڕەکان و نیگەرانییەکانیان لە ئەگەری شکستپێهێنانی ترامپ، سەرۆکی پێشووی ئەمەریکا.
ئادەم شیف، سەرۆکی دیموکراتەکان لە لیژنەی کاروباری ئاسایشی ئەنجومەنی نوێنەرانی ئەمەریکا و جۆرج کلۆنی ئەستێرەی هۆلیوود کە یەکێکە لە گەورەترین لایەنگرانی جۆو بایدن، لەو کەسایەتیانە بوون کە داوای کێشانەوەی بایدنیان کرد.
بەڵام بایدن ڕایگەیاندبوو کە لە پێشبڕکێکەدا دەمێنێتەوە و تەنها "خوای گەورە" دەتوانێت داوای لێبکات کۆتایی بە هەڵمەتەکەی بهێنێت. پاشان وتی کە ئەگەر پزیشکەکان پێی بڵێن کێشەی هەیە، چاو بە کاندیدبوونی خۆیدا بۆ هەڵبژاردنی داهاتووی سەرۆکایەتی دەخشێنێتەوە.
میکانیزمی جێگرەوەی جۆو بایدن بۆ کاندیدبوونی پارتی دیموکرات لە هەڵبژاردنی سەرۆکایەتی ئەمەریکا لە لایەن ئەم پارتەوە بەدواداچوونی بۆ دەکرێت و کاندیدێکی جێگرەوە دەناسێنرێت.
بەیاننامەی جۆو بایدن
جۆو بایدن لە بەیاننامەیەکدا پاشنیوەڕۆی یەکشەممە تیشکی خستە سەر هەندێک لە دەستکەوتەکانی بەڕێوبەرایەتییەکەی، لەوانە بنیاتنانەوەی ژێرخانی ئەمەریکا، کەمکردنەوەی تێچووی دەرمان بۆ بەساڵاچووان، فراوانکردنی بیمەی تەندروستی بۆ خەڵکێکی زیاتر، پێشکەشکردنی چاودێری پزیشکی زیاتر بۆ سەربازە دێرینەکان، دانانی یەکەم ژنی ڕەشپێستی ئەمەریکایی بۆ دادگای باڵا و پەسەندکردنی گرنگترین یاسای پەیوەست بە گۆڕانی کەشوهەوا و ڕایگەیاند کە ئەمەریکا هەرگیز بەم شێوەیە بە باشی ئامادە نەبووە بۆ سەرکردایەتیکردن.
— Joe Biden (@JoeBiden) July 21, 2024
سەرۆکی ئەمەریکا لە درێژەدا ئاماژەی بەوەشکردووە هیچ کام لە دەستکەوتەکانی بەڕێوبەرایەتییەکی بەبێ هاوکاری گەلی ئەمەریکا جێبەجێ نەدەکرا. جۆو بایدن بە ئاماژەدان بە سەرکەوتنی حکومەتەکەی لە دژی پەتای کۆرۆنا و هەروەها دژی قەیرانی ئابووری ئەمەریکا، گوتی کە لە ماوەی سەرۆکایەتییەکەیدا پشتگیری لە دیموکراسی لە ئەمەریکا کردووە و هاوپەیمانییەکانی لە سەرانسەری جیهان بەهێزتر کردووە.
بایدن باسی لە خزمەتکردنی ئەمەریکا کرد لە پۆستی سەرۆککۆماریدا وەک گەورەترین شەرەفی ژیانی خۆی و ئاماژەی بەوەشکرد، هەرچەندە هەوڵی ئەوە دەدا جارێکی دیکە بەشداری لە هەڵبژاردنەکانی داهاتووی سەرۆکایەتیدا بکات، بەڵام لە بەرژەوەندی پارتی دیموکرات و گەلی ئەمریکای دەبینێت کە خۆی لە کاندیدکردنی بکشێنێتەوە و زیاتر سەرنجی بخاتە سەر کارەکانی لەم ماوەیەی سەرۆکایەتیدا. وتیشی لەم هەفتەیەدا زیاتر لەسەر ئەم بابەتە لەگەڵ گەلی ئەمەریکا قسە دەکات.
ڕاگەیاندنی پشتگیری بایدن بۆ کامیلا هەریس
سەرۆکی ئەمەریکا لە پۆستێکدا لە تۆڕی کۆمەڵایەتی ئێکس نووسیوێتی "هاوڕێ دیموکراتەکانم، بڕیارم داوە کاندیدکردنەکەم قبوڵ نەکەم و هەموو وزەیەکم لەسەر ئەرکەکانم وەک سەرۆککۆمار بۆ ئەم ماوەیە چڕ بکەمەوە. "
بایدن لە درێژەی پۆستەکەدا دەڵیت "یەکەم بڕیاری من وەک کاندیدی پارتەکەم لە ساڵی 2020 ئەوە بوو کە کامیلا هەریس وەک جێگری سەرۆک هەڵبژێرم و ئەمە باشترین بڕیار بووە کە داومە. ئەمڕۆ دەمەوێت پشتگیری تەواوی خۆم پێشکەش بکەم بۆ ئەوەی کەمیلا ئەمساڵ کاندیدی پارتەکەمان بێت."
My fellow Democrats, I have decided not to accept the nomination and to focus all my energies on my duties as President for the remainder of my term. My very first decision as the party nominee in 2020 was to pick Kamala Harris as my Vice President. And it’s been the best… pic.twitter.com/x8DnvuImJV
— Joe Biden (@JoeBiden) July 21, 2024
کاردانەوەی دانۆڵد ترامپ بەرامبەر بە کشانەوەی بایدن لە کاندیدبوونی بۆ سەرۆکایەتی
لە وەڵامی کشانەوەی جۆو بایدن لە هەڵبژاردنەکان، ترامپ کاندیدی پارتی کۆمارییەکان ڕایگەیاند سەرۆکی ئەمەریکا "ئامادەی بەردەوام بوون" لە هەڵمەتی هەڵبژاردنەکانیدا نەبوو.
لە پۆستێکیدا لە تۆڕی کۆمەڵایەتی تروث سوشال نووسیویەتی بایدن ئامادە نییە وەک سەرۆکی ئەمەریکا "خزمەت" بکات و "هەرگیز ئامادە نەبووە".
ترامپ کە چەند ڕۆژێک لەمەوبەر لە کۆنفرانسی نیشتمانی کۆمارییەکان وەک کاندیدی فەرمی پارتەکەی بۆ هەڵبژاردنەکانی مانگی نۆڤەمبەری ئەمساڵ ناسێندرا، درێژەی بە ڕەخنەکانی لە جۆو بایدن دا و ڕایگەیاند کە "ئێمە بەهۆی سەرۆکایەتییەکەیەوە زیانێکی زۆرمان پێدەگات" بەڵام بەڵێنیدا و گوتی "ئەمە چارەسەر دەکەین."
شومەر ستایشی بایدن دەکات
چاک شومەر ستایشی بایدن دەکات و دەڵێت ئەو نیشتمانپەروەرێکی ڕاستەقینە و ئەمەریکاییەکی گەورەیە.
سەرۆکی زۆرینەی دیموکراتەکان لە ئەنجومەنی سینات، جۆو بایدنی بە "نیشتمانپەروەرێکی ڕاستەقینە و ئەمەریکاییەکی گەورە" ناوبرد، ئەمەش لە وەڵامی بڕیارەکەی جۆو بایدن بۆ کشانەوە لە کاندیدبوونی بۆ پۆستی سەرۆکایەتی ئەمەریکا.
Joe Biden has not only been a great president and a great legislative leader but he%27s a truly amazing human being. His decision of course was not easy, but he once again put his country, his party, and our future first.Joe, today shows you are a true patriot and great American.
— Chuck Schumer (@SenSchumer) July 21, 2024
بە گوتەی سیناتۆر شومەر، "جۆو بایدن نەک هەر سەرۆکێکی گەورە و سەرکردەیەکی گەورەی یاسادانان بووە، بەڵکو مرۆڤێکی سەرسوڕهێنەریش بووە".
داوای دەستلەکارکێشانەوەی بایدن دەکرێت لە سەرۆککۆماری
یەکێک لە سەرکردە کۆمارییەکان لە کۆنگرێسی ئەمەریکا، دوای ڕاگەیاندنی کشانەوەی جۆو بایدن لە کاندیدبوونی بۆ سەرۆکایەتی، داوای دەستلەکارکێشانەوەی دەستبەجێی سەرۆکی ئەمەریکای لە پۆستی سەرۆکایەتی کرد.
At this unprecedented juncture in American history, we must be clear about what just happened. The Democrat Party forced the Democrat nominee off the ballot, just over 100 days before the election. Having invalidated the votes of more than 14 million Americans who selected Joe…
— Speaker Mike Johnson (@SpeakerJohnson) July 21, 2024
مایک جۆنسۆن، سەرۆکی کۆمارییەکانی ئەنجومەنی نوێنەرانی ئەمریکا لە پۆستێکدا لە تۆڕی کۆمەڵایەتی ئێکس بڵاوکردەوە و نووسیویەتی "ئەگەر جۆو بایدن شایستەی ئەوە نەبێت خۆی کاندید بکات بۆ پۆستی سەرۆکایەتی ئەمەریکا، ئەوا شایستەی ئەوە نییە ئەرکەکانی سەرۆکایەتی ئەمەریکاش جێبەجێ بکات و پێویستە دەستبەجێ دەست لەکاربکێشێتەوە."
هیلاری و بیل کلینتۆن پشتگیری لە کامیالا هەریس دەکەن
بیل کلینتۆن سەرۆکی پێشووی ئەمەریکا و هیلاری کلینتۆن وەزیری پێشووی دەرەوەی ئەمەریکا لە پەیامێکدا لە تۆڕی کۆمەڵایەتی ئێکس نووسیویانە " شانازی دەکەین کە دەنگمان بخەینە سەر دەنگی سەرۆککۆمار و پاڵپشتی کامیلا هەریس جێگری سەرۆک دەکەین و هەموو هەوڵێک دەدەین بۆ پشتگیریکردنی."
Statement from President Clinton and Secretary Clinton pic.twitter.com/R7tYMFWbsu
— Bill Clinton (@BillClinton) July 21, 2024
ئەم هەواڵە نوێ دەکرێتەوە...