چاودێرانی سیاسی و سەربازی پێیانوایە گرووپە میلیشیا شیعەکانی عێراق بوونەتە مایەی سەرئێشە بۆ سەرئاسایشی عێراق و دەڵێن، تەنانەت ئەگەر عێراق ڕاستەوخۆ لە جەنگی هەڵگیرساوی ڕۆژهەڵاتی ناوەڕاستەوە نەگلێت، لێدانی ئەو گروپانە لە لایەن ئیسرائیلەوە ئەگرێکی جدییە.
لیوا محەمەد سابیر، شارەزایی سەربازی بە دەنگی ئەمەریکای ڕاگەیاند،" ئێستا عێراق دوو هێزی تێدایە، هێزێکی یاساییە ئەویش سوپای عێراقە و لەژێر کۆنترۆڵی حکومەتدایە، بەڵام هێزەکەی دیکە بە دەرە لە یاسا و میلیشیایە، لەلایەن کۆمەڵێک لایەنی سیاسی سەر بە دەوڵەتانی ئیقلیمی وەک ئێران بەڕێوە دەبرێت و پڕ چەک دەکرێن، بۆیە گوێڕایەڵی حکومەتی عێراقی نین و ئەوەش وایکردووە گرفت دروست بکەن، لەکاتێکدا عێراق نایەوێت بچێتە ناو هیچ شەڕێکەوە و بەڕووی ئەوەی وتووە و هەوڵی بۆ دەدات."
وتیشی "شەڕ بەهیچ شێوەیەک عێراق ناگرێتەوە، بەڵام چ ئیسڕائیل بێت یاخود ئەمەریکا دەتوانن بەئاسانی پێگەی گروپە چەکدارییە میلیشیاکان ئەوانەی بەدەرن لە یاسا لەناو خاکی عێراق بکەنە ئامانج. بە دڵنیایەوە ئەوەش لە داهاتوویەکی نزیکدا ڕەنگە ڕووبدات و لە بنکە و بارەگاکانیان بدرێت."
ئەو چاودێرە سەربازیە ئاماژە بۆ ئەوەش دەکات کە "عێراق لە ژێر کۆنترۆڵی ئەمەریکایە، چ ئاسمانی بێت یاخود لە ڕووی ئیداری و دارایی و سەربازییەوە."
محەمەد شیاع سودانی، سەرۆک وەزیرانی عێراق بەبەردەوامی باس لەوە دەکات کە ڕێگە نادەن عێراق ببێتە گۆڕەپانی یەکلاکردنەوەی ململانێ و ناکۆکییەکانی وڵاتان."
چاودێرانی سیاسی پێیان وایە تاکە چارەسەر بۆ دوور کەوتنەوەی عێراق لەو ئاگرەی کە ڕۆژهەڵاتی ناوەڕاستی گرتووەتەوە ڕێگریکردنە لە جوڵەی گروپە چەکدارە میلیشیاکان بۆ ئەوەی ئەو ئاگرە عێراقیش نەگرێتەوە، بەڵام بۆ ئێستای حکومەت بەئەستەمی دەزانن کە بتوانێت گروپەکان ڕابگرێت و دەستی " ئێران" لەناوخۆی عێراق دووربکاتەوە.
دلێر عەبدوڵا، چاودێری سیاسی بە دەنگی ئەمەریکای ڕاگەیاند،"بوونی میلیشیا شیعەکان یان ئەو میلیشیایانەی کە لە ژێر کاریگەری کۆماری ئیسلامی ئێراندان، بە دڵنیایەوە بوونەتە مایەی سەر ئێشە لەلایەک بۆ گەلانی عێراق و لەلایەکی دیکەش بۆ حکومەتی عێراقیش، چونکە بیرمان نەچێت سیاسەتی حکومڕانی ئێستای عێراقی بە ئاڕاستەی دۆستایەتییە لەگەڵ ئەمەریکا و بەرژەوەندیەکانی ئەمەریکا، بەڵام بوونی ئەم میلیشیایانە بە تەواوەتی ئەتوانین بڵێن مەترسین بۆ سەر ئاسایشی عێراق."
وتیشی "ژیانی خەڵک بە جۆرێک لە جۆرەکان بەهۆی میلیشیاکان لە مەترسیدایە و ڕەنگە لە داهاتوویەکی نزیکدا بەپێی ئەو سیاسەتەی کە ئێستا ئیسرائیل پەیڕەوی دەکات، عێراقیش بکەوێتە ژێر هەڕەشە و مەترسی دەوڵەتی ئیسرائیلەوە و ئاڵۆزی لە ناوچەکە دروست بێت."
لە 7 ی مانگی 10 ی ساڵی ڕابردوودا حەماس بووە هۆکاری هەڵگیرسانی جەنگ لە غەززە، ئەوەش دوای ئەوەی چەکدارەکانی حەماس هێرشییان کردە سەر باشووری ئیسڕائیل و بەرپرسانی ئیسڕائیل دەڵێن نزیکەی 1200 کەس کوژراون و زیاتر لە 250 کەسی دیکە بە بارمتە گیراون. لە ئاگربەستەکەی مانگی یانزەدەی هەمان ساڵیشدا نزیکەی نیوەی بارمتەکان ئازاد کران.
لەدوای هەڵگیرسانی جەنگەکەش بەبەردەوامی گروپێکی چەکداری کە لە عێراقن و ناویان لە خۆیان ناوە بەرەی مەقاومە، پاڵپشتی خۆیان بۆ حەماس و غەزە دەردەبڕن و دژایەتی ئیسرائیل دەکەن و هەڕەشە دەکەن، ناو بەناویش بەموشەک و درۆن هێرش دەکەن.
Your browser doesn’t support HTML5
چاودێرانی سیاسی دەڵێن ئەگەری لێدانی میلیشیا شیعەکان لەلایەن ئیسرائیلەوە نزیکە