ئیسرائیل دوا داواکاری وڵاته یه‌کگرتووه‌کانی ئه‌مریکای ڕه‌تکردۆته‌وه بۆ ڕاگرتنی دروسـتکردنی ئۆردوگاکان له که‌ناری ڕۆژئاوا.
گوته‌بێژی حکومه‌تی ئیسرائیلی مارک ڕێـگێڤ گوتی ئیسرائیل په‌یوه‌سـته به به‌ڵێـنه‌کانی بۆ هه‌ڵـوه‌شـاندنه‌وه‌ی نیشـته‌جێـگای بێ مۆڵه‌ت و دروسـت‌نه‌کردنی نیشـته‌جێـگای نوێ، به‌ڵام گوتیشی پـێویسـته ڕێـگا به فراوانکردنی ئۆردوگاکانی ئێسـتا بدرێت له‌به‌ر زیادبوونی ژماره‌ی دانیشـتووان.
ڕێـگێڤ وه‌ڵامی قسه‌کانی ڕۆژی چوارشه‌ممه‌ی وه‌زیری ده‌ره‌وه‌ی ئه‌مریکا هێله‌ری کلنتنی دایه‌وه که گوتبووی وڵاته یه‌کگرتووه‌کانی ئه‌مریکا ده‌یه‌وێت ئیسرائیل فراوانکردنی نیشته‌جێـکاکان ڕابگرێت.
گوته‌گانی ئه‌و به‌ر له کۆبوونه‌وه‌ی ئه‌مڕۆ پـێـنجشه‌ممه‌ی نێوان سه‌رۆکی وڵاته یه‌کگرتووه‌کانی ئه‌مریکا باراک ئۆباما و سه‌رۆکی ده‌سه‌ڵاتی فه‌له‌سـتینی مه‌حمود عه‌باس بوو له کۆشـکی سـپی.
چاوه‌ڕوان‌ده‌کرێت به‌ڕێز عه‌باسیش له میانه‌ی کۆبوونه‌وه‌که‌یدا له‌گه‌ڵ به‌ڕێز ئۆباما داوای ڕاگرتنی فراوانکردنی نیشـته‌جێـگاکانی ئیسرائیلی له که‌ناری ڕۆژئاوا بکات.