بڕیاره ئه‌مرۆ باراک ئۆبامای سه‌رۆکی وڵاته یه‌کگرتووه‌کانی ئه‌مه‌ریکا له کۆشکی سپی میوانداری ڕابه‌ری ڕوحی دوره وڵاتی تبتی، ده‌لای لاما بکات، ئه‌مه‌ش وێڕای ناره‌زایی‌یه‌کی زۆری چین له‌و باره‌یه‌وه.
ده‌لای لاما، دوێنێ چوارشه‌ممه گه‌یشته واشنتن، به‌ر له کۆبوونهوهی چاوه‌ڕوانکراوه‌که‌ی له‌گه‌ڵ به‌ڕێز ئۆبامادا، ئه‌وه‌ی که له ژوورێکی تایبه‌تی کۆشکی سپی ئه‌نجام ده‌درێت، نه‌ک له ئۆفیسی شێوه هێلکه‌یی ئه‌و کۆشكه‌دا.
له‌و باره‌یه‌وه، وته‌بێژێکی کۆشکی سپی ده‌ڵێت ڕێگه به ڕۆژنامه‌وانان نادرێت تاوه‌کو وێنه بگرن و رووماڵی کۆبوونه‌وه‌که‌ی نێوان سه‌رۆکی ئه‌مه‌ریکا و ده‌لای لاما بکه‌ن. به‌ڵام وته‌بێژه‌که ده‌شڵیت کۆشکی سپی وێنه‌یه‌کی فه‌رمی کۆبوونه‌وه‌که بڵاوده‌کاته‌وه.
ئه‌وه‌ی شایانی باسه، کۆبوونه‌وه‌که‌ی نێوانیان ڕاگه‌یاندنی توند ئامێزی له لایه‌ن چینه‌وه‌ی لێ‌که‌وتۆته‌وه و حکومه‌تی چینی به توندی له دژی سه‌ردانه‌که‌ی ڕابه‌ری تبتیـیه‌کانه بۆ واشنتن و له هه‌فته‌ی ڕابردوودا، چین داوی له وڵاته یه‌کگرتووه‌کانی ئه‌مه‌ریکا کردبوو، بانگهێشت‌کردنی ده‌لای لاما بۆ ئه‌مه‌ریکا ده‌ست‌به‌جێ هه‌ڵبوه‌شێنێته‌وه. هه‌روه‌ها وته‌بێژی وه‌زاره‌تی ده‌ره‌وه‌ی چینی له هه‌فته‌ی ڕابردوودا گووتی ڕه‌نگه کۆبوونهوهی سه‌رۆکی ئه‌مه‌ریکا له‌گه‌ڵ ده‌لای لاما، زیاتر زیان به په‌یوه‌ندیـیه‌کانی نێوان هه‌ردوو وڵات بگه‌ێنێت، ئه‌و په‌یوه‌ندیـیانه‌ی که له‌م دوایـیه‌دا ئاڵۆز بوو ، به‌هۆی پلانی ئه‌مه‌ریکا بۆ فرۆشتنی چه‌ک به تایوان و ناکۆکی نێوانیان له‌سه‌ر ڕێژه‌ی ئاڵوگۆڕی دراوی چینی.