بەرزبونەوەی ڕێژەی توشبوان بە پەتای کۆڤید 19 لە شاری سلێمانی و دەوروبەری وەهای کردوە بەرپرسان و پزیشکان و بەشێک لە کارمەندانی تەندورستی لەوە بەدەر نەبن، بەڵام نیگەرانیەکان لەوەدان هێشتا مەترسی ڤایرۆسەکە لەلای بەشێک لە خەڵک بە هەند وەرناگیرێت.
لەم ووتوێژەی بەشی کوردی دەنگی ئەمەریکا لەگەڵ جێگری بەڕێوەبەری گشتی تەندروستی سلێمانی دکتۆر هێرش سەید سەلیم باس لە وردەکاری دۆخەکە دەکەین.
دکتۆر هێرش دەڵێت دوای چەند هەفتەیەک لە هەستکردن بە نیشانەکانی توشبون بە کۆرۆنا دەرکەوت هەڵگری ڤایرۆسەکەیە بەڵام دوای ئەوەی لە ماڵەوە خۆی کەرەنتین کرد هەنگاوەکانی چارەسەری گرتەبەر، لە ئێستادا باری تەندروستی باشەو ڤایرۆسەکەی پەڕاندوە.
سەبارەت بە دۆخی ئێستای شاری سلێمانیش دەڵێت سەرەڕای ڕاگەیاندی قەدەغەی هاتوچۆ بەڵام هاوڵاتیان پابەند نین چونکە سەرجەم فەرمانبەرانی پۆلیسی هاتوچۆی سلێمانی بەهۆی پێنەدانی موچەکانیان لەلایەن حکومەتەوە مانیان گرتووە و بۆ ناڕەزایی دەربڕین دێنە سەر شەقامەکان، لە هەمان کاتدا بەشێک لە خەڵک هۆشیارن و پابەندی خودپارێزی دەبن، کە دەبینن ڕێژەی توشبوان و ئەوانەشی بە ڤایرۆسەکە گیانلەدەست دەدەن بەرزبۆتەوە، ئەوەی کە هەیە لە ئێستادا لە %3 یەو نەگەیشتۆتە ئاستێکی مەترسیدار.
دکتۆر هێرش ئاماژەشی بەوە کرد کە نەبوونی متمانەی خەڵک بە بوونی ڤایرۆسەکە، دەگەڕێتەوە بۆ گومان لە بە سیاسیکردنی دۆخەکە و نەمانی متمانەی خەڵک بە حکومەت لەمەڕ پێنەدانی موچە و ئاوڕنەدانەوە لە خەڵکی کەم دەرامەت لەم دۆخە سەختەدا.
Your browser doesn’t support HTML5
وتووێژ لەگەڵ دکتۆر هێرش سەید سەلیم