سەرۆکی شارەوانی نیویۆرک کشانەوەی خۆی ڕاگەیاند لە پـێشبڕکێی نێو دیموکراتەکان بۆ هەڵبژاردنەکانی سەرۆکایەتی ئەمەریکا لە ساڵی 2020 .
بێڵ دێ بلاسیۆ کە نەیتوانی لە ڕاوەرگرتنە گشتیـیەکاندا زیاتر لە دەنگی 0.5% ی خەڵکی بەدەستبهێنێت، ئەمڕۆ کشانەوەی خۆی ڕاگەیاند و بە کەناڵی MSNBC گوت"دیارە ئێستا کاتی گونجاو نیـیە خۆم کاندیدبکەم... بۆیە کۆتایی بە هەڵمەتەکەم دەهێنم."
بەمەش 19 کەسایەتی دیموکرات ماوەنەتەوە کە خوازیارن ببنە کاندیدی پارتەکەیان لە هەڵبژاردنەکانی ساڵی داهاتوو تاوەکو ڕووبەڕووی سەرۆک ترامپ ببنەوە.
بێڵ دێ بلاسیۆ جگە لەوەی نەیتوانی لە دیبەیتەکاندا بەرامبەر ڕکابەرەکانی بە لێهاتوو دەربکەوێت، هەروەها ڕەخنەیەکی زۆری لێگیرا بەهۆی سەرقاڵبوونی بە هەڵمەتەکانی هەڵبژاردنەوە و نەچووەتە سەر کارەکەی.
سەرۆک ترامپ دەستبەجێ لە تویتەرەکەی بە شێوەیەکی گاڵتەئامێز نووسی ئەو سەرۆک شارەوانیەی نیویۆرک کە نیوە دەوامی دەکرد لە پـێشبڕکێی گەیشتن بە سەرۆکایەتی ئەمەریکا کشایەوە.
Oh no, really big political news, perhaps the biggest story in years! Part time Mayor of New York City, @BilldeBlasio, who was polling at a solid ZERO but had tremendous room for growth, has shocking dropped out of the Presidential race. NYC is devastated, he’s coming home!
— Donald J. Trump (@realDonaldTrump) September 20, 2019
بێڵ دێ بلاسیۆ دووەم کاندیدی دیموکراتەکانە لە نیویۆرکە لە پـێشبڕکێی گەیشتن بە هەڵبژاردنەکانی سەرۆکایەتی 2020 بکشێتەوە. مانگی ڕابردوو سیناتۆر کریستین جیلیبارد کشایەوە پاش ئەوەی نەیتوانی پشتیوانیـیەکی ئەوتۆ بەدەستبهێنێت.
لە ئێستادا جۆ بایدن جێگری پـێشووی سەرۆکی ئەمەریکا لە پـێشەوەیە و بە دوایدا هەردوو سیناتۆر ئێلیزابێت وارن و بێرنی ساندەرز.