پـۆلیسی فەڕەنسا کەسێکی دەستگیرکرد پاش ئەوەی بۆ ئۆتۆمبیلەکەی چووەتە سەر ڕێڕەوێکی فڕۆکەخانەی لیۆن لە ناوەڕاستی ڕۆژهەڵاتی وڵاتەکە.
ئاژانسی دەنگ‌وباسی فڕانس پـرێس دەڵێت کەسەکە دوو دەروازەی بەزاندووە و چووەتە وێستگەی ژمارە یەکی فڕۆکەخانەکە و پاشان گەیشتووەتە سەر ڕێڕەوی نیشتنەوەی فڕۆکەکان.
سەرچاوەیەکی نزیک لە لێکۆڵینەوەکان گوتویەتی پـێشتر پـۆلیس ئاگادارکرابووەوە لەوەی ئۆتۆمبیلێک بە خێرایـیەکی زۆر و بە ئاڕاستەی پـێچەوانە لەسەر شا ڕێـیەکی نزیک فڕۆکەخانەکە دەڕوات.
کەس زیانی پـێنەگەیشتووە، بەڵام بەهۆی ڕووداوەکە گەشتەکان لە فڕۆکەخانەکە ڕاگیران. هێشتا ناسنامەی کەسەکە و هۆکارەکەی ئاشکرا نەکراون.
کەسێکیش لە ڕێگەی تۆڕی کۆمەڵایەتی تویتەر ڤیدیۆیەکی ساتی ڕووداوەکەی بڵاوکردووەتەوە.