ماکرۆن هۆشداری دەداتە ئێران لە پشتیوانیکردنی ڕووسیا لە جەنگەکەی دژی ئۆکرانیا

ئۆفیسی سەرۆکایەتی فەڕەنسا ڕایگەیاند سەرۆکی فەڕەنسا ئیمانوێل ماکرۆن لە گفتوگۆیەکدا داوای لە سەرۆکی نوێی ئێران مەسعود پزیشکیان کردووە پشتیوانی لە " جەنگە دوژمنکارییەکەی " ڕووسیا نەکات دژی ئۆکرانیا.

ماکرۆن بە پزیشکیانی وتووە کە " دەبێت هەموو شتێک بکرێت بۆ خۆبەدوورگرتن لە پەرەسەندنی گرژییە سەربازییەکان " لە نێوان ئیسڕائیل و حزبوڵای لوبناندا دوای هێرشە موشەکییەکەی سەر بەرزاییەکانی گۆلان کە ئیسڕائیل حزبوڵای بە بەرپرس دانا لەو هێرشە، داواشی لە ئێران کرد " پشتیوانییەکانی بۆ کارەکتەرە ناسەقامگیرکەرەکان ڕابگرێت."

ماکرۆن داوای لە ئێران کرد داوای دان بەخۆداگرتن بکات، وتی جەنگێکی نوێ " دەرەنجامێکی ڕووخێنەری دەبێت " لەسەر ناوچەکە، کە بەهۆی جەنگەکەی ناو غەززەی نێوان ئیسڕائیل و حەماسەوە لە دۆخێکی خراپدایە.

ماکرۆن پیرۆزبایی لە پزیشکیان کرد لەسەر سەرکەوتنەکەی لە هەڵبژاردنەکانی سەرۆکایەتی ئێراندا و تیشکیشی خستەسەر " پێویستییەکان بۆ گۆڕانکارییەکی ڕاستەقینە لە وڵاتەکەدا."

هەروەها داوای لە سەرۆکی ئێران کرد " کۆتایی بهێنێت بە پەرەسەندنی نیگەرانکەری بەرنامە ئەتۆمییەکەی ئێران " و داوای چارەسەرێکی دیبلۆماتی کرد.

ماکرۆن داوای دەستبەجێ ئازادکردنی سێ هاووڵاتی فەڕەنسایی کرد کە " بە شێوەیەکی نادادپەروەرانە ماوەی دوو ساڵە لە زیندانەکانی ئێراندا زیندانی کراون."

وتی ئازادکردنییان لەلایەن ئێرانەوە " مەرجێکی حەتمییە و مەرجێکی پێشوەختیشە بۆ باشکردنی " پەیوەندییەکانی نێوان پاریس و تاران.

سەرچاوە/ فرانس پرێس، دەنگی ئەمەریکا