سەرۆکی ئەمەریکا جۆو بایدن ڕۆژی یەکشەممە کۆبوونەوەیەکی لەگەڵ ڕابەرانی وڵاتانی کۆمەڵەی حەوتدا ڕێکخست، ئەوەش بە مەبەستی هەماهەنگیکردن بۆ سەرکۆنەکردنی هێرشە بێپێشینە سەرنەکەوتووەکەی ئێران بۆ سەر ئیسڕائیل و ڕێگریکردن لە پەرەسەندنی گرژییەکان لە سەرانسەری ناوچەکەدا.
ئەمەریکا یارمەتی ئیسڕائیلیدا لە خستنە خوارەوەی دەیان فڕۆکەی بێفڕۆکەوان و موشەکدا کە لەلایەن تارانەوە ئاڕاستەی ئیسڕائیل کران. بەرپرسانی ئیسڕائیلیش دەڵێن بەرپەرچی لە سەدا 99 ی موشەک و فڕۆکە بێفڕۆکەوانەکانی ئێرانییان داوەتەوە و هێرشەکە هیچ زیانێکی گەورەی لێنەکەوتووەتەوە.
بایدن درەنگانێکی ڕۆژی شەممە وتی " لەسەر فەرمانی من، لە پێناو پشتیوانیکردن لە بەرگری ئیسڕائیل، سوپای ئەمەریکا لە ماوەی هەفتەی ڕابردوودا فڕۆکە و کەشتییە تێکشکێنەرەکانی موشەکی باڵیستیکی گواستەوە بۆ ناوچەکە. بەهۆی ئەمە و توانا سەرسوڕهێنەرەکانی سەربازەکانمانەوە، یارمەتی ئیسڕائیلماندا لە خستنە خوارەوەی نزیکەی سەرجەم فڕۆکە بێفڕۆکەوان و موشەکەکان."
بایدن لە بەیاننامەیەکدا وتی بە نەتانیاهوی وتووە " ئیسڕائیل توانایەکی سەرسوڕهێنەری پیشاندا بۆ بەرگریکردن و تەنانەت شکستهێنان بە هێرشە بێپێشینەکانیش، پەیامێکی ڕوونی نارد بۆ دوژمنەکانی لەسەر ئەوەی ناتوانن بە شێوەیەکی کاریگەر هەڕەشە لە ئاسایشی ئیسڕائیل بکەن."
بایدن وتی کۆبوونەوەکەی کۆمەڵەی حەوت مەبەست لێی " هەماهەنگیکردنە بۆ وەڵامێکی دیپلۆماتی یەکگرتوو بۆ هێرشەکەی ئێران."
لەلایەکی دیکەوە کۆشکی سپی لە تۆڕی کۆمەڵایەتی ئێکس نوسیویەتی ڕابەرانی کۆمەڵەی حەوت سەرکۆنەی هێرشەکەی ئێران دەکەن دژی ئیسڕائیل و جەختییان لە پابەندبوونی خۆیان کردووەتەوە بۆ ئاسایشی ئیسڕائیل.
سەرچاوە/ AP
