کەسێکی سۆمالی تەمەن 24 ساڵ لە شوێنێکی گشتی شاری ڤورسبۆرگی ئەڵمانیا بە چەقۆ هێرشی کردە سەر خەڵکی و بەپـێی پـۆلیس 3 کەس کوژراون و ژمارەیەک برینداربوون و برینی هەندێکیان مەترسیدارە.
ڕووداوەکە پاش نیوەڕۆی ئەمڕۆ هەینی بووە و هێشتا هۆکاری هێرشەکە نازانرێت. پـۆلیس فرانکۆنیای خواروو لەسەر تویتەرەکەی نووسیویەتی هێرشبەرەکە دەستگیرکراوە پاش ئەوەی پـۆلیس چەکی بەکارهێناوە. دەشڵێت ژیانی هێرشبەرەکە لە مەترسیدا نیـیە.
دەزگاکانی ڕاگەیاندنی خۆجێـی دەڵێن پـۆلیس گولـلەیان بە قاچی هێرشبەرەکەوە ناوە.
ڤیدیۆی ساتی هێرشەکە لە سۆشیال میدیاکان بڵاوکراوەتەوە و دەڵێن 3 کەس کوژراون و 6 کەسی دیکە برینداربوون.