ڕێکخراوە هەورامیەکان و حکومەتی هەرێم دەیانەوێت هەورامانی لهۆنیش بچێتە ناو بڕیارەکەی یونسکۆوە وەک شوێنەوارێکی جیهانی

ژمارەیەک لە ڕێکخراوە هەورامیەکان بۆردێکیان بە ناوی ڕۆچنە بۆ تۆمارکردنی هەورامانی تەخت لە سنوری پارێزگای هەڵەبجە پێکهێنا تا لەلایەن ڕێکخراوی یونسکۆوە وەک ناوچەکی شوێنەواری جیهانی بناسێنرێت، وەزیری ڕۆشنبیری حکومەتی هەرێمی کوردستانیش دەڵێت لە ئایندەیەکی نزیکدا "هەورامانی ڕۆژهەڵات و باشور پێکەوە خۆشحاڵی خۆمان بۆ ئەو بڕیارەی یونسکۆ دەردەبڕین و کاریش دەکەین تا هەورامانی لهۆنیش بکرێتە بەشێک لە بڕیارەکە."

ڕێکخراوە هەورامیەکان لە پاریزگای هەڵەبجە بۆردێکیان بە ناوی ڕۆچنە بۆ قسەکردن لە گەڵ ڕێکخراوی یونسکۆ بۆ فراوان کردنی بڕیارەکەی سەربارەت بە ناساندنی هەورامان وەک ناوچەکی شوێنەواری جیهانی پێکهێنا و لە یەکەم کۆبوونەوەیاندا لەگەڵ ڕوناکبیرانی هەورامان دانیشتن و هەوڵەکانیان بۆ فراوانکردنی بڕیارەکە دەستپێکرد .

فریاد هەورامی ئەندامی بۆردەکە لە لێدوانێکدا بە دەنگی ئەمەریکای راگەیاند :"نوسەران و توێژەران کۆبووینەوە تا هەورامانی باشوریش لە لایەن ڕێکخراوی یونسکۆ بخرێتە ڕیزی ناوچە شوێنەواریەکانەوە ، لە هەورامان 800 ساڵ پێش هاتنی مەسیح ژیان هەبووە، دەیان بەڵگە و دۆکیومێنت هەن کە دەبێت یونسکۆ وەک میراتێک بیان پارێزێت کە ئەمە هەنگاوی یەکەمە".

عاسی کاکەیی بەشداربووی دانیشتنەکەی بۆردی ڕۆچنە بوو لە لێدوانێکدا بە دەنگی ئەمریکایڕایگەیاند "هەورامان ناوچەیەکە مێژووی دێرینی هەیە و زمانی خۆی هەیە و ناوچەیەکی گەشتیاری و کەلتوریە گرنگە ،ڕێکخراوی یونسکۆ لە نزیکەوە بەدواداچوون بکات."

حەمەی حەمەسەعید وەزیری ڕۆشنبیری و لاوانی حکومەتی هەرێمی کوردستان لە لێدوانێکدا بە دەنگی ئەمریکای ڕاگەیاند " ئەو بڕیارە زۆرگرنگە بۆ هەورامان ، من لەگەل ڕوناکبیرەکان دانیشتم باسم لەوە کرد ئەو کارانەی کە کراوە بۆ ناساندی هەورامانی تەخت کۆمیتەیەکی پسپۆڕ بوون وژمارەیەکی فراوان بەڵگەیان داوەتە ڕێکخراوی یونسکۆ، لە ئێستادا ڕوناکبیرانی ڕۆژهەڵات و باشور خۆمان ئامادە دەکەین تا لە هەڵەبجە پێکەوە خۆشحاڵی خۆمان بۆ بڕیارەکە دەرببڕین."

ڕێکخراوی یونسکوی سەربەنەتەوە یەگرتووەکان لە 27-7-2021 ناوچەی هەورامانی تەختی لە سنوری پارێزگاکانی کرماشان و سنەی بە ناوچەیەکی شوێنەواری جیهانی ناساند، ئێستاش هەوڵەکان لەلاڕێکخراوە هەورامیەکان بە پشتیوانی حکومەت دەستیان پێکردوە تا لە ئایندەدا بە هەمان شێوەی هەورامانی لهۆنیش و بەڵگەکان بگەیەنە ڕێکخراوی یونسکۆ.

فەرحان هەورامانی