حکومەتی هەرێمی کوردستان دەستیکردووە بە بەرەنگاربوونەوەی ماددە هۆشبەرەکان لەسەر ئاستی جیا جیا و وەزارەتی پەروەردەی ڕاسپاردووە بۆ بڵاوکردنەوەی هۆشیاریی زانستی لەسەر بەرەنگاربوونەوەی ماددە هۆشبەرەکان.
سەرۆکایەتی دیوانی ئەنجومەنی وەزیرانی حکومەتی هەرێمی کوردستان لە 11 ی مانگی 10 ی ساڵی 2023 دا و لەسەر فەرمانی سەرۆکی ئەنجومەنی وەزیران، مەسرور بارزانی، وەزارەتی پەروەردەی حکومەتی هەرێمی کوردستانی بۆ بڵاوکردنەوەی هۆشیاریی بەرەنگاربوونەوەی ماددە هۆشبەرەکان لە ناوەندەکانی خوێندن و کۆمەڵگەدا ڕاسپاردووە.
لە نوسراوەکەدا ئاماژە بەوە دراوە " لە ماوەی 30 ڕۆژدا پلان و نەخشەڕێگەی وەزارەتی پەروەردە بۆ ئەم مەبەستە بۆ ئەنجومەنی وەزیران بەرز دەکرێتەوە، تاوەکو کاری لەسەر بکرێت."
سەرۆکی حکومەتی هەرێمی کوردستان مەسرور بارزانی بەشداری لە کۆنفرانسێکی بەرەنگاربوونەوەی ماددە هۆشبەرەکان و کارتێکەرە عەقڵییەکانیش دەکات لە هەولێر کە هەریەک لە لایەنە پەیوەندیدارە ناوخۆیی و دەرەکییەکانی پەیوەست بەو پرسەوە بەشداری تێدا دەکەن.
لە کۆنفرانسەکەدا تاوتوێی پرسی بەرەنگاربوونەوەی ماددە هۆشبەرەکان دەکرێت و چارەسەری هەمەلایەنە بۆ ڕووبەڕووبوونەوەی دەخرێتەڕوو.
مەسرور بارزانی سەرۆکی حکومەتی هەرێم لە پۆستێکی تۆڕی کۆمەڵایەتی ئێکس (تویتەر) دا دەڵێت "بەکارهێنانی ماددە هۆشبەرەکان و بازرگانیکردن پێوەی کۆمەڵگاکان بە تەواوەتی دەخاتە مەترسییەوە. هیچ سنوورێک ناناسن.
ڕوبەڕوبونەوەی هەردووکیان پێویستی بەوەیە پێکەوە لە عێراق و لەگەڵ دراوسێکانمان کاربکەین.
ئێمە پشتگیری لە ناوەندەکانی چاکسازی دەکەین بۆ چارەسەرکردنی قوربانییەکان و یارمەتیدانی چاکبوونەوەیان. هیوادارم هاوبەشەکانمان بەشداریمان بکەن."
Drug abuse and trafficking puts entire communities at risk. They recognize no borders.Tackling both requires us to work together in Iraq and with our neighbors.We are backing rehabilitation centers to treat victims and help their recovery. I hope our partners will join us. pic.twitter.com/DJqL3J9z8R
— Masrour Barzani (@masrourbarzani) October 15, 2023
پێویستە جیاوازی بکەین لە نێوان بازرگانانی ماددە هۆشبەرەکان و ئەو کەسانەی کە دەبنە قوربانی و دەبێت یارمەتیدەر بین بۆ چارەسەرکردنی ئالوودەبووان.بەرەنگاربوونەوەی ماددە هۆشبەرەكان تەنیا ئەركی حکومەت نییە، بەڵکو ئەرکێکی هاوبەشی هەموو لایەکمانە.
— Masrour Barzani (@masrourbarzani) October 15, 2023
بەپێی فەرمانگەی میدیا و زانیاری حکومەتی هەرێمی کوردستان، ئامانجی سەرەکی کۆنفرانسەکە بریتییە دەبێت لە لێکۆڵینەوەیەکی وردی پرسی ماددە هۆشبەرەکان و کارتێکەرە عەقڵییەکان و هاوکاریکردنی حکومەت لە بەهێزترکردنی سیاسەتی بەرەنگاربوونەوەی ئەو ماددانەدا، ئەوەش لە پێناو پاراستنی ئاسایشی کۆمەڵایەتی و تەندروستی هاووڵاتییانی هەرێمی کوردستان.
سەرچاوە/ ماڵپەڕی حکومەتی هەرێمی کوردستان