دیپـلۆماتێـک بە ئاژانسی دەنگ‌وباسی ڕۆیتەرزی گوتووە داعش سـاڵی ڕابردوو بە گازی خەردەل لە هێزەکانی پـشمەرگەی داوە، ئەمەش یەکەم جارە لە پاش ڕژێمی سەدام حسێن چەکی کیمیاوی لە عێراقدا بەکاربهێنرێت.
بەپـێی سەرچاوەیەک لە ڕێکخراوی قەدەغەکردنی چەکی کیمیاوی تاقیکردنەوەکان نیشانیان داوە گازی خەردەل بەکارهێنراوە کاتێـک نزیکەی 35 پـێشمەرگە لە مانگی هەشتی ساڵی ڕابردوو لە بەرەکانی شەڕ لە باشوری ڕۆژئاوای هەولێر پـێوەبوون.
ڕێکخراوەکە دەسـتنیشانی نەکردووە کێ گازە خەردەلەکەی بەکارهێناوە، بەڵام دیپـلۆماتەکە کە نەیویستووە ناوی ئاشکرابکرێت چونکە هێشتا بە فەرمی ئەنجامەکان ڕانەگەیەندراون، گوتویەتی لێکۆڵینەوەکان سەلماندویانە چەکدارانی داعش بەکاریان هێناوە.
مانگی دەی سـاڵی ڕابردوو ڕێکخراوی قەدەغەکردنی چەکی کیمیاوی گەیشتە ئەو ئەنجامەی داعش لە سوریا گازی خەردەلی بەکارهێناوە.
شارەزایان پـێـیان وایە سەرچاوەی ئەو گازی خەردەلانە عەمبارە نهێنیـیەکانی چەکی کیمیاوی لەشکری سوریابن کە ڕەنگە کەوتبنە دەستی داعشەوە یان داعش خۆی فێری ئامادەکردنی بووبێت تاوەکو بە موشەک یان گولـلە خومپارە هەڵی بدات.