له‌وتووێژێكی ژیار محه‌مه‌د له‌به‌شی كوردی ده‌نگی ئه‌مریكا له‌گه‌ڵ مەلا مەڕوان گه‌ڵاڵی سەرۆکی فڕاکسیۆنی کۆمەڵی ئیسلامی له‌خولی چواره‌می په‌رله‌مانی هه‌رێمی كوردستان، دەڵێت" ئەو (49) ملیۆنەی خانەنشینی پەرلەمانتاران به‌پێی شه‌ریعه‌تی ئیسلام حەڵاڵە، لەبەر ئەوەی ئەگەر حەرام بوایە ئێـمە وەرماندەگرت و بەلایدا نەدەچوین، ئێمە بە ملیار بە چەندین دەفتەر پارەمان دراوەتێ بۆ ئەوەی هەڵوێستی خۆمان بگۆڕین بەڵام نەمان گۆڕیووە. ئه‌وە موچەی شەش مانگە هەر بۆ خانەنشینی پەرلەمانتار نیە بەڵکو بۆ هەموو فەرمانبەرێکە، دەشڵێت" ئەو بڕە پارەیە بەپێی یاسایە و هەیە، پابەند نەبوون بەهەر بڕگە و ماده‌ی یاسایەک دەبێتە یاسا شکێنی، وە کاتێک پەرلەمانتارێک یا فڕاکسیۆنێک ئەو بڕە پارەیە وەرنەگرێت نابێتە هۆی گۆڕینی یاساکە، بەڵکو یاساکە وەک خۆی دەمێنێتەوە وە ئەو پارەیە ئەگەر وەرنەگیرێت ناخرێتە سەر موچەی خانەنشینی ئەو کەسانەی کە موچەکەیان کەمە، بەڵکو بەپێچەوانەوە بەشێوەیەکی نایاسایی تر و گەندەڵی خەرج دەکرێت، حکومەت بە شێوازی (سوء التصرف)سود لەو پارەیە دەبینێت، هەروەها ڕەخنە لەو کەسانەش دەگرێت کە ڕەخنە لەپەرلەمانتارانی ئۆپۆزسیۆن دەگرن لەسەر وەرگرتنی ئەو پارەیە کە جیاوازییان نیە لەگەڵ پەرلەمانتارانی حیزبە دەسەڵاتدارەکان و دەڵێت" ئەگەر کەسێک ئەوە عەقڵیەتی بێت هەموو جیاوازییەکانی پەرلەمانتارانی ئۆپۆزسیۆن و پارتی و یەکێتی لەو 49 ملیۆنەدا ببینێتەوە ئەمن دەڵێم هەر شایستەی وەڵام دانەوە نیە، ده‌شڵێت، ناکرێت بێیت بە "عاتفی" موچەی په‌رله‌مانتار کەمبکەیتەوە کەبەیانی کەس ئامادە نەبێت بێت دەوام بکات."
مەلا مەڕوان لەسەرەتای گفتوگۆکەدا وتی" بابەتی خانەنشینی پەرلەمانتاران وەک هەر فەرمانبەرێک بەپێی یاسا لەعیراقدا دیاری کراوە، وەک فراکسیۆنی کۆمەڵی ئیسلامی لەسەر خانەنشینی پەرلەمانتار بۆچونمان وایە کە ڕەچاوی تەمەن و خزمەت بکرێت، کاتی خۆی یاسای چاکسازیمان لەپەرلەمان بۆ ئەوە دەرکرد لەپەرلەمانتاران بەڵام بندیوارەکان و ئەوانەی لێی زیانمەندبوون لە فەیس بوک هاتنە سەرخەت و خۆپیشاندانیان سازکرد.
پێشتر هەریەکە لە سەفین دزەیی وتەبێژی فەرمی حکومەتی هەرێمی کوردستان، هەروەها بێگەرد تاڵەبانی سکرتێری پەرلەمانی هەرێمی کوردستان لەخولی چوارەم لەمیانەی وتووێژەکانیاندا لەگەڵ ژیار محەمەد لەبەشی کوردی دەنگی ئەمریکا ڕایانگەیاندبوو" هۆکاری پەسەند نەکردن و گەڕانەوەی پڕۆژە چاکسازییەکەی حکومەت پەرلەمانتاران بەتایبەت پەرلەمانتارانی ئۆپۆزسیۆن بوون."
بەڵام مەلا مەڕوان سەرۆکی فڕاکسیۆنی کۆمەڵی ئیسلامی لە خولی چوارەمی پەرلەمانی هەرێمی کوردستان کە حیزبه‌کەی لە کۆتا مانگەکانی کابینەی حکومەتی هەرێمی کوردستان لە حکومەتی هەرێم کشانەوە و ئۆپۆزسیۆن بونیان ڕاگەیاند ڕەتیدەکاتەوە ئەوان بەربەست بوبێتن لەبەردەم پڕۆژە چاکسازیەکەی حکومەت، لەو ڕوەوە له وتووێژه‌كه‌ی ده‌نگی ئه‌مریكا وتی" ئێمە بەهیچ جۆرێک دژی ئەو یاسایە نەوەستاینەوە، بەپێچەوانەوە لەپشت پەردەوە ئەندامانی دوو حیزبە دەسەڵاتدارەکە کە بەهەزاران موچەخۆری نایاساییان هەیە دژی پڕۆژەکە وەستانەوە و بونە ڕێگر."
مەلا مەڕوان باسی لەهۆکاری وەرگرتنی ئەو بڕە پارەیە کرد و وتی" ئەوە یاسایە و هەیە، پابەند نەبوون بەهەر بڕگە و یاسایەک دەبێتە یاسا شکێنی، وە کاتێک پەرلەمانتارێک یا فڕاکسیۆنێک ئەو بڕە پارەیە وەرنەگرێت نابێتە هۆی گۆڕینی یاساکە، بەڵکو یاساکە وەک خۆی دەمێنێتەوە وە ئەو پارەیە ئەگەر وەرنەگیرێت ناخرێتە سەر موچەی خانەنشینی ئەو کەسانەی کە موچەکەیان کەمە، بەڵکو بەپێچەوانەوە بەشێوەیەکی نایاسایی تر و گەندەڵی خەرج دەکرێت، حکومەت بە شێوازی (سوء التصرف) سود لەو پارەیە دەبینێت، بۆیە ئێمە ئەوە ناکەین بەڵکو داکۆکی لەسەر گۆڕینی یاساکە و کەمکردنەوەی موچەی پلەباڵاکان دەکەینەوە کە بەرژەوەندی خەڵك و دامودەزگاکانی خۆشماندا بێت، ناشکرێت بێیت بە "عاتفی" موچەی په‌رله‌مانتار کەمبکەیتەوە کەبەیانی کەس ئامادە نەبێت بێت دەوام بکات."
گه‌ڵاڵی وتیشی: مەبەستم هەر موچە نیە، بەڵام بەڵێ بۆ نمونە لە ئەمریکا موچەی وەزیر و سەرۆک کۆماری و ئەندامێکی کۆنگرێس ئایا وەک موچەی مامۆستا و کرێکارێکە؟"
لەوەڵامی ئەو پرسیارەی ئایا کەباسی نمونەی موچە دەکەی لەئەمریکا ، ئایا لەهەرێمی کوردستان لەهەموو شتێکدا چاو لە ئەمریکا کراوە؟
مەلا مەڕوان وتی" نەخێر ئەگەر لەهەموو شتێکدا چاو لە ئەمریکا بکەین دارمان بەسەر بەردەوە نامێنێتەوە، بڕوام وایە، به‌ڵام لەوشتانەی کە بەرژەوەندی میلەتەکەمانی تێدایە ئامادەین چاو لەهەموو شوێنێک بکەین."
کەواتە موچەی خانەنشینی پەرلەمانتاران و پلە تایبەتیەکانی تر کوێی لەبەرژەوەندی میللەتدایە؟
مەلا مەڕوان وتی" جارێ خولی چوارەم خانەنشینی دیارینەکردووە، وە ئەو دوو حیزبە دەسەڵاتدارە، "پارتی و یەکێتی" ئەم یاسایانەیان داناوە، لەهەموو خولەکاندا ئۆپۆزسیۆن هەوڵی داوە کەمی بکاتەوە بەڵام پێی نەکراوە."
هەروەها لەبارەی ناڕەزایی و نیگەرانی لایەنگرانی حیزبە ئۆپۆزسیۆنەکان لەسەر وەرگرتنی ئەو بڕە پارەیە لەلایەن ئۆپۆزسیۆنەوە کە هەندێک دەپرسن جیاوازی پەرلەمانتارانی ئۆپۆزسیۆن و دوو حیزبە دەسەڵاتدارەکەی هەرێمی کوردستان چی دەمێنێت ئەگەر ئەوانیش ئەو 49 ملیۆن و 200 هەزار- دینار-عیراقیان وەک خانەنشینی ئیکرامی پەرلەمانتاران وەرگرت؟
مەلا مەڕوان وتی" ئەگەر کەسێک ئەوە عەقڵیەتی بێت هەموو جیاوازییەکانی پەرلەمانتارانی ئۆپۆزسیۆن و پارتی و یەکێتی لەو 49 ملیۆنەدا ببینێتەوە ئەوا من دەڵێم هەر شایستەی وەڵام دانەوە نیە، چونکە ئەو 49 ملیۆنە موچەی شەش مانگە ئەگەر موچەکەی کەمبکرێتەوە ئەو ڕێژەیە نامێنێت، هەموو فەرمانبەرێک مامۆستایەک کەخانەنشین کرا موچەی ئەو شەش مانگە وەردەگرێت."
ده‌رباره‌ی گلله‌یی خه‌ڵك به‌تایبه‌ت به‌شێك له موچه خۆران كه‌ده‌ڵێن: له‌كاتێكدا موچه‌ی سێ مانگی فه‌وتاوه به‌ڵام په‌رله‌مانتاران چۆن ئه‌و بڕه پاره زۆره وه‌ك خانه‌نشینی وه‌رده‌گرن؟
مه‌لا مه‌ڕوان گه‌ڵاڵی وتی: ئێـمە کاتی خۆی وەڵامی پرسیارەکانی خەڵکمان داوەتەوە دەشێت بەشێکی "قەناعەتکار بن، بەشێکی-شی قەناعەتکار نەبن."
له‌وه‌ڵامی ئه‌و پرسیاره‌ی ئایا به‌پێی شه‌ریعه‌تی ئیسلامی ئه‌و بڕه پاره‌یه حه‌ڵاڵه یا حه‌رام؟
مه‌لا مه‌ڕوان گه‌ڵاڵی وتی: ئه‌و (49) ملیۆنە حەڵاڵە، لەبەر ئەوەی ئەگەر حەرام بوایە ئێـمە وەرماندەگرت و بەلایدا نەدەچوین، ئێمە بە ملیار بە چەندین دەفتەر پارەمان دراوەتێ بۆ ئەوەی هەڵوێستی خۆمان بگۆڕین بەڵام نەمان گۆڕیووە. وەک وتم ئه‌وە موچەی شەش مانگە هەر بۆ خانەنشینی پەرلەمانتار نیە بەڵکو بۆ هەموو فەرمانبەرێکە، به‌ڵام به‌پێی ڕێژه‌كه ده‌گۆڕێت."
Your browser doesn’t support HTML5
ده‌قی وتووێژه‌كه‌ی ژیار محه‌مه‌د له‌گه‌ڵ مه‌لا مه‌ڕوان گه‌ڵاڵی