سه‌وسه‌ن محه‌مه‌د میرخان سەرۆکی لیژنەی شەهیدان و قوربانیانی جینۆساید و زیندانیانی سیاسی له‌په‌رله‌مانی كوردستان له‌فراكسیۆنی پارتی دیموكراتی كوردستان، ڕه‌خنه له‌دابه‌شكردنی چه‌ند كه‌لوپه‌ل و هاوكارییه‌ك ده‌گرێت كه دوێنێ له‌لایه‌ن ڕێكخراوێكه‌وه به‌سه‌ر ژماره‌یه‌ك له‌كه‌سوكاری "شه‌هیدانی شه‌ڕی داعش " دابه‌شكرا به‌پێی وته‌ی كه‌سوكاری ئه‌و پێشمه‌رگانه كه‌لوپه‌له‌كان جل و به‌رگی كۆن و نه‌عل و دایبی منداڵان بووه، له‌و ڕوه‌وه سه‌وسه‌ن محه‌مه‌د میرخان ئه‌و كاره به‌بێ ڕێزی ناوده‌بات و ده‌ڵێت" هه‌ر ڕێكخراوێك ئازاده كه شت دابه‌ش بكات به‌سه‌ر خه‌ڵك له‌هه‌رێمی كوردستان به‌ڵام ئه‌وان چین و توێژێكیان هه‌ڵبژاردووه كه له‌ڕاستیدا جێگه‌ی قبوڵ كردن نییه به‌و شێوازه ئه‌و شتانه دابه‌شی كه‌سوكاری شه‌هیدان بكه‌ن، ده‌شڵێت" ئێمه خۆمان لیژنه‌ی په‌رله‌مانی ده‌توانێت لێكۆڵینه‌وه له‌سه‌ر ئه‌و مه‌سه‌له‌یه بكات و به‌دواداچوون بكات و بزانێت ئه‌و هۆكاره چییه كه ئه‌وانه جلوبه‌رگی كۆنیان به‌سه‌ر كه‌سوكاری شه‌هیداندا دابه‌شكردووه؟ ئێمه به‌دواداچوونی خۆمان ده‌كه‌ین و لیژنه‌ی بۆ دروست ده‌كه‌ین بزانیین كێ كه‌مته‌رخه‌مه له‌م ئیهمالییه‌ی كه كراوه به‌رامبه‌ر كه‌سوكاری شه‌هیدان كه جلی كۆنیان به‌سه‌ردا دابه‌ش بكرێت."
"ده‌بێت باشترین هاوكاری بێت ناكرێت بێن جلوبه‌رگی كۆن به‌سه‌ر كه‌سوكاری شه‌هیدان دابه‌ش بكرێت "
له‌سه‌ره‌تای وتووێژه‌كه‌دا سه‌وسه‌ن محه‌مه‌د میرخان وتی" له‌ڕاستیدا لیژنه‌ی ئێمه لیژنه‌ی كاروباری شه‌هیدان و جینۆساید و زیندانیانی سیاسییه له‌په‌رله‌مانی كوردستان هه‌ر ڕێكخراوێك له‌زمنی كاره‌كه‌ی خۆیدا ئازاده كه هاوكاری به‌سه‌ر كه‌سوكاری شه‌هیدان و خێزانه كه‌مده‌رامه‌ته‌كان دابه‌ش بكات به‌ڵام چۆنیه‌تی ئه‌و جۆری ئه‌و شتانه‌ی كه دابه‌شیان كردووه دیاره بووته هۆی ناڕه‌زایه‌تی كه‌سوكاری شه‌هیدان ئێمه پێمان وایه كه‌سوكاری شه‌هیدان له هه‌رێمی كوردستان ده‌بێت به باشترین شێوه خزمه‌تیان بكرێت و باشترین شتیان پێشكه‌ش بكرێت چونكه ئه‌وانه ئازیزانی خۆیان له‌پێناو ئه‌و خاكه و ئه‌و وڵات و كوردستانه به‌خشیووه به‌نه‌ته‌وه‌ی خۆیان له‌به‌رئه‌وه منیش پێم وایه كه‌هاوكاریه‌ك دابه‌ش ده‌كرێت به‌سه‌ر كه‌سوكاری شه‌هیدان ده‌بێت باشترین هاوكاری بێت ناكرێت بێن جلوبه‌رگی كۆن به‌سه‌ر كه‌سوكاری شه‌هیدان دابه‌ش بكرێت له‌ڕاستیدا منیش ئه‌وه به‌بێ ڕێزی ده‌زانم به‌رامبه‌ر كه‌سوكاری شه‌هیدان چونكه ئێمه هه‌موومان له هه‌رێمی كوردستان چ له‌په‌رله‌مان چ له‌حكومه‌ت ده‌بێت به‌باشترین شێوه خزمه‌تی كه‌سوكاری شه‌هیدان بكرێت نه‌ك به‌و شێوازه شتی زۆر كه‌م و كۆنیان به‌سه‌ردا دابه‌ش بكرێت."
" ده‌بووایه ڕێگه‌یان به‌خۆیان نه‌دایه كه ئه‌و جۆره شتانه دابه‌ش بكه‌ن به‌سه‌ر كه‌سوكاری شه‌هیداندا "
ناوبراو ئه‌وه‌شی وت" له‌هه‌رێمی كوردستان ڕێكخراوی زۆر هه‌یه ڕێكخراوی خێرخوازی زۆر هه‌یه ڕێكخراوی ناوخۆ، ڕێكخراوی نێوده‌وڵه‌تی هه‌یه كه‌هاوكاری به‌سه‌ر كه‌سوكاری شه‌هیدان و كه‌مده‌رامه‌تان دابه‌ش ده‌كه‌ن، من له‌ڕاستیدا نازانم كه ئایا فلته‌ر هه‌یه یان نا به‌ڵام خۆیان ده‌بووایه بیریان له‌وه كردبایه‌وه كه‌ئه‌وانه چین و توێژێكن كه ئازیزانی خۆیان له‌ده‌ستداوه له‌پێناو خاك و نیشتمان و كوردستاندا له‌به‌رئه‌وه ده‌بووایه ڕێگه‌یان به‌خۆیان نه‌دایه كه ئه‌و جۆره شتانه دابه‌ش بكه‌ن به‌سه‌ر كه‌سوكاری شه‌هیداندا، كه‌سوكاری شه‌هیدان تاجی سه‌ری ئێمه‌ن واته ئێمه ده‌بێت به‌هه‌موو شێوازێك خزمه‌تیان بكه‌ین بۆیه جێگه‌ی نیگه‌رانی ئێمه‌شه كه بۆچی ڕێكخراوێك ده‌بێت بێت به‌و شێوازه شتی كۆن دابه‌ش بكات به‌سه‌ر كه‌سوكاری شه‌هیداندا!"
" له‌وانه شه‌هیدانی شه‌ڕی داعش كه ده‌بێت عێراق قه‌ره‌بووی ئه‌و شه‌هیدانه بكاته‌وه به‌ڵام تائێستا هیچیان بۆ نه‌كراوه "
سەرۆکی لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانی كوردستان ئاماژه‌ی به‌وه‌كرد" له‌ڕاستیدا كه‌سوكاری شه‌هیدان تائێستاش به‌و شێوازه‌ی كه‌پێویسته خزمه‌تیان نه‌كراوه به‌هۆی قه‌یرانی دارایی كه به‌سه‌ر هه‌رێمی كوردستاندا هات به‌هۆی ئه‌وه‌ی كه حكومه‌تی فیدڕاڵی عێراق تائێستا شایسته داراییه‌كانی هه‌رێمی كوردستان و له‌هه‌مان كاتیشدا شایسته داراییه‌كانی كه‌سوكاری شه‌هیدان، له‌وانه شه‌هیدانی شه‌ڕی داعش كه ده‌بێت عێراق قه‌ره‌بووی ئه‌و شه‌هیدانه بكاته‌وه به‌ڵام تائێستا هیچیان بۆ نه‌كراوه، وه به‌هه‌موو شێوازێك له‌مافی خۆیان بێبه‌ش كراون تا ئێستاش لیستی مووچه‌ی شه‌هیدانی شه‌ڕی داعش نه‌خراوه‌ته‌وه سه‌ر وه‌زاره‌تی شه‌هیدان."
"به‌دواداچوونی جدی ده‌كه‌ین تابزانین كێ ئه‌و كاره‌ی كردووه "
سه‌وسه‌ن محه‌مه‌د میرخان جه‌ختیكرده‌وه لیژنه‌كه‌یان به‌دواداچوون بۆ دابه‌شكردنی ئه‌و جۆره هاوكارییانه‌دا ده‌كات، له‌و ڕووه‌وه ده‌ڵێت" ئێمه وه‌كو لیژنه‌ی شه‌هیدان به‌دواداچوون بۆ ئه‌و مه‌سه‌له‌یه ده‌كه‌ین كه دوێنێ ئه‌و مه‌سه‌له‌یه له‌تۆڕه كۆمه‌ڵایه‌تیه‌كان وروژێنراوه و باسكراوه له‌ڕاستیدا ئێمه زانیاری ته‌واوه‌تیمان نییه به‌دواداچوونێكی جدی بۆ ده‌كه‌ین وه‌كو لیژنه‌ی شه‌هیدان بزانیین كێ ئه‌و كاره‌ی كردووه و هۆكاره‌كان چی بوون كه به‌و شێوازه و به‌و جۆره ئه‌و هاوكاریانه دابه‌شكراوه چونكه له‌ڕاستیدا ئێمه‌ش قبوڵ ناكه‌ین به‌و شێوازه شتی كۆن به‌سه‌ر كه‌سوكاری شه‌هیداندا دابه‌ش بكرێت."
"له‌به‌رئه‌وه‌ی كه بێ ڕێزی پێكراوه، به‌و شێوازه گوزارشت له‌هه‌ستی خۆی ده‌كات "
له‌یه‌كێك له گرته‌ڤیدۆییه‌كان كه به‌شێك له تۆڕه كۆمه‌ڵایه‌تیه كوردییه‌كان و ژماره‌یه‌ك میدیای لۆكاڵی هه‌رێمی كوردستان بڵاوییان كرده‌وه، خانمێك كه خۆی به‌خێزانی "پێشمه‌رگه‌یه‌كی شه‌هیدی" شه‌ڕی داعش ناساند" ڕایگه‌یاند" خۆزگه هاوسه‌ره‌كه‌م له‌ڕێگای كوردستان گیانی خۆی به‌ختكردووه"
سەرۆکی لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانی كوردستان ده‌ڵێت" من به‌داخه‌وه‌م ئێمه به‌ڕاستی پشتیوانی كه‌سوكاری شه‌هیدانین من زۆر "موته‌ئه‌سیرم" كه خانه‌واده‌یه‌كی شه‌هید به‌و شێوازه هه‌ستی خۆی ده‌رببڕێت واته له‌پێناو ئه‌و خاكه و ئه‌و كوردستانه ئازیزترین كه‌سی خۆی له‌ده‌ستداوه له‌به‌رئه‌وه‌ی كه بێ ڕێزی پێكراوه به‌و شێوازه گوزارشت له‌هه‌ستی خۆی بكات من زۆر نیگه‌رانم "ئنشاالله" ئێمه به‌دواداچوونێكی جددی ده‌كه‌ین پێویسته ته‌واوی كه‌سوكاری شه‌هیدانی كوردستان به‌باشترین شێوه خزمه‌ت بكرێت."
"حكومه‌تی فیدڕاڵی هۆكاری سه‌ره‌كی ئه‌و بێ مووچه‌ییه و ئه‌و ئیمتیازه باشانه‌ی كه‌نادرێت به كه‌سوكاری شه‌هیدان "
"ئێمه هه‌میشه له لیژنه‌ی شه‌هیدانی داكۆكی له‌وه ده‌كه‌ین كه ته‌نانه‌ت له‌و چاكسازیه‌ی كه ده‌كرێت و له‌و داهاته‌ی كه ده‌گه‌ڕێته‌وه بۆ حكومه‌تی هه‌رێمی كوردستان پێویسته به‌شێكی بۆ كه‌سوكاری شه‌هیدان ته‌رخان بكرێت چونكه چه‌ندین ساڵه مووچه‌ی كه‌سوكاری شه‌هیدان هه‌روه‌كو خۆیه‌تی و گۆڕانكاری به‌سه‌ردا نه‌هاتووه ئێمه ده‌زانیین قه‌یرانی داراییه و حكومه‌تی فیدڕاڵی هۆكاری سه‌ره‌كی ئه‌و بێ مووچه‌ییه و ئه‌و ئیمتیازه باشانه‌ی كه‌نادرێت به كه‌سوكاری شه‌هیدان به‌ڵام له‌هه‌مان كاتدا حكومه‌تی هه‌رێمی كوردستان ده‌بێت به‌هه‌موو توانای خۆی ڕێگه‌چاره‌یه‌ك بدۆزێته‌وه بۆ ئه‌وه‌ی ژیانێكی شایسته بژین."سه‌وسه‌ن محه‌مه‌د میرخان سەرۆکی لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانی كوردستان وای وت"
سه‌وسه‌ن محه‌مه‌د میرخان ده‌شڵێت" به‌پێی یاسا كه‌سوكاری شه‌هیدان ماف و ئیمتیازی خۆیان هه‌یه به‌ڵام به‌پێی داخوازی ئێمه نییه له‌ڕاستیدا ئێمه ده‌مانه‌وێت ژیانێكی شایسته‌تر بژین كچ و كوڕی شه‌هیدان و خانه‌واده‌ی شه‌هیدان ماف و ئیمتیازی خۆیان هه‌یه له‌وانه مووچه‌یه، زه‌وییه، خانووه، مناڵه‌كانیان ده‌توانن بخوێنن له‌سه‌ر حسابی حكومه‌ت به‌ڵام به‌پێی "تموحی" ئێمه نییه. ئێمه ده‌مانه‌وێت له ئاینده‌دا كه‌سوكاری شه‌هیدان مووچه‌كانیشیان زیاتر بكرێت ، كچ و كوڕه‌كانیان زیاتر گرنگیان پێبدرێت زیاتر بهێنرێنه ناو بواری حكومه‌ت كه‌رتی تایبه‌ت ته‌نانه‌ت نه‌خۆشخانه‌ی تایبه‌تیان بۆ بكرێته‌وه ، له زانكۆ حكومیه‌كان گرنگی زیاتریان پێبدرێت وه ڕێژه‌یه‌كیان بۆ دیاری بكرێت بۆئه‌وه‌ی له قوتابخانه و زانكۆ ئه‌هلیه‌كانیش ده‌رفه‌تیان پێبدرێت كه‌وه‌ربگیرێن."
" ئه‌وان چین و توێژێكیان هه‌ڵبژاردووه كه له‌ڕاستیدا جێگه‌ی قبوڵ كردن نییه، لیژنه‌ی بۆ دروست ده‌كه‌ین بزانیین كێ كه‌مته‌رخه‌مه له‌م ئیهمالییه‌ی كه كراوه "
سەرۆکی لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانی كوردستان دووپاتیكرده‌وه" هه‌روه‌كو باسم كرد هه‌ر ڕێكخراوێك ئازاده كه شت دابه‌ش بكات به‌سه‌ر خه‌ڵك له‌هه‌رێمی كوردستان به‌ڵام ئه‌وان چین و توێژێكیان هه‌ڵبژاردووه كه له‌ڕاستیدا جێگه‌ی قبوڵ كردن نییه به‌و شێوازه ئه‌و شتانه دابه‌شی كه‌سوكاری شه‌هیدان بكه‌ن. كه‌سوكاری شه‌هیدان زۆر چاوه‌ڕوانیان هه‌یه له په‌رله‌مان وه له‌حكومه‌تی هه‌رێمی كوردستان كه‌خزمه‌تێكی زیاتریان بكه‌ن نه‌ك بێن جلوبه‌رگی كۆن به‌سه‌ر كه‌سوكاری شه‌هیدان دابه‌ش بكه‌ن من به بێڕێزی ده‌زانم و به‌دواداچوونیشی بۆ ده‌كه‌ین."
هه‌روه‌ها وتیشی" ئێمه خۆمان لیژنه‌ی په‌رله‌مانی ده‌توانێت لێكۆڵینه‌وه له‌سه‌ر ئه‌و مه‌سه‌له‌یه بكات و به‌دواداچوون بكات و بزانێت ئه‌و هۆكاره چییه كه ئه‌وانه جلوبه‌رگی كۆنیان به‌سه‌ر كه‌سوكاری شه‌هیداندا دابه‌شكردووه، ئێمه به‌دواداچوونی خۆمان ده‌كه‌ین و لیژنه‌ی بۆ دروست ده‌كه‌ین بزانیین كێ كه‌مته‌رخه‌مه له‌م ئیهمالییه‌ی كه كراوه به‌رامبه‌ر كه‌سوكاری شه‌هیدان كه جلی كۆنیان به‌سه‌ردا دابه‌ش بكرێت."
Your browser doesn’t support HTML5
ده‌قی وتووێژه‌كه‌ی ژیار محه‌مه‌د له‌گه‌ڵ سه‌وسه‌ن محه‌مه‌د میرخان NOV 12/020