هاوکاتی ئەوەی ئەنجومەنی ئاسایشی نەتەوە یەکگرتووەکان شەوی چوارشەممە کۆبوونەوەیەکی بە پەلەی ئەنجام دا وەک هەوڵێک بۆ ڕێگەگرتن لە ڕوودانی شەڕ، ڤلادیمیر پوتنی سەرۆکی ڕووسیا دەستپێکردنی ئۆپەراسیۆنێکی لەشکری لە ڕۆژهەڵاتی ئۆکرانیا ڕاگەیاند، گوایە بۆ وەڵامدانەوەی "هەڕەشەکانی ئۆکرانیایە".
بەپـێی هەواڵەکان کە کیێڤی پایتەخی ئۆکرانیاوە دێن، چەندان تەقینەوەی لە دەرەوەی شارەکە پیستراون. کاربەدەستان بە دەنگی ئەمەریکایان وتووە دوو فڕۆکەخانەی کیێڤ لەلایەن فڕۆکەی بەبێ فڕۆکەوانەوە کراونەتە ئامانج. ژمارەیەکیش لە تەقینەوەکان دەنگی موشەکی دژە فڕۆکە بوون کە لەلایەن هێزەکانی ئۆکرانیاوە گیراونەتە فڕۆکەکان. کاربەدەستێکیش وتی ڕەنگە ڕووسیا سیستەمی بەرگری ئاسمانی بکاتە ئامانج وەک ڕێگەخۆشکەرێک بۆ هێرشی دیکەی ئاسمانی.
جۆو بایدن، سەرۆکی ئەمەریکا لە ڕاگەیاندنێکدا وتی "تەواوی جیهان نوێژ و نزا بۆ خەڵکی ئۆکرانیا دەکات کە ڕووبەڕووی هێرشێکی بێ پاساو بوونەتەوە لەلایەن هێزی لەشکری ڕووسیاوە. سەرۆک پوتن بە مەبەست شەڕی هەڵبژارد، ئەمەش شیانی هەیە زیانێگی گیانی زۆری لێبکەوێتەوە و خەڵکی بکەونە مەینەتیـیەوە. تەنیا ڕووسیا لەو کوشتن و ماڵوێرانیـیە بەرپـرسیارە کە لەم هێرشە دەکەوێتەوە. ئەمەریکا و هاوپەیمانانی و هاوبەشەکانی بە یەک دەنگی و بە توندی وەڵامی دەدەنەوە. جیهان ڕووسیا بەرپـرسیاردەکات."
دیمیترۆ کۆلیبا، وەزیری دەرەوەی ئۆکرانیا، ئەویش لەسەر تویتەرەکەی نووسیوەیەتی پوتن هێرشی گەورەی کردووەتە سەر وڵاتەکەی و شارەکانی ئۆکرانیا کەوتوونەتە بەر هێرشی لەشکری ڕووسیاوە. دەشڵێت ئۆکرانیا بەرگری لە خۆی دەکات و سەردەکەوێت، وە داوا لە جیهان دەکات کاربکات بۆ ڕاگرتنی پوتن.
لە لایەکی دیکە پاسەوانانی سنووری ئۆکرانیا ڕایانگەیاند وڵاتەکەیان بە درێژایی سنوورەکانی لەگەڵ ڕووسیا و بێلاڕووس تۆپباران دەکرێت و هێزەکانی ئۆکرانیاش وەڵام دەدەنەوە. دەشڵێن هێزەکانی پیادەی ڕووسیا هاتوونەتە ناو خاکی ئۆکرانیاوە.
شارەکانی دیکەی ئۆکرانیا کەوتوونەتە بەر هێرشەکانی ڕووسیا، لەوانە شاری خارکیڤ لە ڕۆژهەڵاتی وڵاتەکە.
دوکەڵ لە فڕۆکەخانەیەکی لەشکری لە نزیک شاری خارکیڤ بەرزدەبێتەوە، پێنشجەممە 24 ی مانگی دووی 2022
خەڵکی سیڤیلی کیێڤی پایتەخت لە بەیانی زووەوە بەشێکیان لە تاو بۆردومانەکانی ڕووسیا دەستیانکرد بە چۆڵکردنی شارەکەیان.
بەشێک لەو خەڵکەکەی ئۆتۆمبیلیان نیـیە بە پیادە شارەکانیان چۆڵ دەکەن.
کیێڤی پایتەخت، ڕۆژی پـێنجشەممە 24 ی مانگی سێی 2022
تەنانەت لە شاری لڤیڤ لە ڕۆژئاوای ئۆکرانیا کە زۆرێک لە وڵاتان باڵیۆزخانەکانیان بۆ ئەوێ گواستەوە، زەنگی ئاگادارکردنەوە لە هێرش تیایدا لێدراوە و دەنگی تەقینەوەش بیستراوە.
ژمارەیەکیش ڕوویان کردووەتە وێستگەکانی میترۆی شارەکانەوە.
خێزانێک لە شاری کیێڤ لە بەرەبەیانەوە ڕوویان لە وێستگەیەکی میترۆ کردووە هەتا لە بۆردومانەکان پارێزراو بن، پێنجشەممە 24 ی دووی 2022
وەزارەتی بەرگری ڕووسیا دەڵێت لەشکری وڵاتەکەی بە هێرشەکانی سیستەمی بەرگری ئاسمانی و بنکەکانی هێزی ئاسمانی ئۆکرانیا لە کارخستووە.
لەشکری ئۆکرانیاش لای خۆیەوە دەڵێت 5 فڕۆکەی جەنگی و هەلیکۆپتەرێکی ڕووسیا خستووە.